Fl-ewwel reazzjoni tiegħu għall-pjan ta’ riġenerazzjoni mħabbar mill-gvern, Adrian Delia qal li jinsab sodisfatt li ħafna minn dak li kien pożittiv kienu proposti li ilu li għamel l-PN iżda ddispjaċut li dawn waslu nofs triq.
Delia qal li hemm nuqqas ta’ viżjoni fejn se ssir ir-riġenerazzjoni. Qal li hemm bżonn li ssir investigazzjoni fis-setturi kollha li hemm bżonn nixprunaw. Qal li l-gvern “qed jaqta’ qalbu” mit-turiżmu mingħajr inċentiva biex nikkompetu ma’ pajjiżi barranin.
Huwa rrefera għal dak li qal il-Ministru tal-Finanzi li uża t-terminu ta’ nifs u qal li huwa “nifs żgħir ħafna”.
Delia qal li inutli ngħidu li huwa perjodu sabiħ meta tara l-familji li tħallew minsijin u rrefera għall-11,000 persuna li jinsabu bla xogħol.
Finalment huwa ddeskriva dan il-pjan bħala “insult b’mod maħsub lil dawk li offrew is-servizzi tagħhom”. Qal li l-gvern ma offrielhom l-ebda tip ta’ rikonoxximent għajr iċ-ċapċip li kien kapaċi joffrilhom il-poplu Malti.
