Il-pass mgħaġġel tal-progress teknoloġiku qed iġib miegħu bidliet profondi fl-ambjent tax-xogħol. L-evoluzzjoni tad-dinja tax-xogħol – bl-awtomatizzazzjoni, l-intelliġenza artifiċjali, u x-xogħol li jikkreaw il-pjattaformi diġitali – issawwar mill-ġdid b’mod drammatiku, biex inbidlu l-istrutturi tradizzjonali tal-impjiegi u magħhom il-ħiliet. Dan jeħtieġ politiki li jippromwovu tkabbir inklużiv, il-protezzjoni soċjali, u l-ugwaljanza.
Il-General Workers’ Union qed tipproponi r-reviżjoni u l-aġġornament immedjati tal-qafas tar-relazzjonijiet industrijali u tal-impjiegi ta’ Malta, ippromulgati fl-2003 u li ma għadhomx jirriflettu r-realtajiet u l-isfidi ta’ suq tax-xogħol modern u dinamiku. Dawn ir-riformi, li huma essenzjali biex jiġi żgurat li s-suq tax-xogħol Malti jkun trasparenti u ġust, se jpoġġu lill-pajjiż bħala mexxej fid-difiża tad-drittijiet tal-ħaddiema fl-Ewropa u lil hinn minnha.
Il-proposti huma ħafna: bħall-paga minima ugwali mill-età ta’ 16-il sena, biex jiġu żgurati l-ġustizzja u d-dinjità għall-ħaddiema żgħażagħ, l-impjieg mill-ġdid tal-ħaddiema b’kuntratti definiti biex jinżammu l-esperjenza u l-għarfien, u l-ħlas doppju għax-xogħol nhar ta’ Ħadd, irrispettivament mis-settur ekonomiku.
Tipproponi wkoll diskussjoni nazzjonali għal regoli robusti dwar is-saħħa u s-sigurtà biex nindirizzaw ix-xogħol f’kundizzjonijiet estremi tat-temp – kemm fuq ġewwa kif ukoll fuq barra, b’linji gwida li jistgħu jipproteġu aħjar lill-ħaddiema mill-istress mis-sħana u mill-perikli relatati mat-temperatura.
Iżda radikalment, qed ifittxu introduzzjoni gradwali u strateġika ta’ ġimgħa tax-xogħol ta’ erbat ijiem jew ta’ 32 siegħa, opportunità għal Malta biex tmexxi prattiki tax-xogħol sostenibbli. L-esperjenza internazzjonali tipprovdi evidenza konvinċenti favur din il-bidla: prinċipalment fl-Iżlanda, is-sigħat imnaqqsa għal 2,500 ħaddiem irriżultaw fl-istess produttività jew fi produttività mtejba, filwaqt li taw spinta sinifikanti lill-benesseri tal-impjegati u naqqsu l-istress. Illum, 86% tal-ħaddiema mpjegati fl-Iżlanda għandhom id-dritt li jaħdmu sigħat iqsar mingħajr tnaqqis fil-pagi.
Il-benefiċċji għal Malta jistgħu jkunu sinifikanti: ġimgħa tax-xogħol iqsar tnaqqas l-eżawriment tal-burnout, ittejjeb is-saħħa mentali u fiżika, ittejjeb is-sodisfazzjon fix-xogħol, u ssaħħaħ il-ħajja tal-familja u tal-komunità, biex iżżomm aktar talent f’suq tax-xogħol globali kompetittiv, filwaqt li tpoġġi lil Malta bħala ekonomija li tħares ’il quddiem u li tiffavorixxi lill-ħaddiema.
Dawn huma biss porzjon żgħir tal-proposti tal-GWU, konsistenti mal-objettivi strateġiċi ta’ Malta kif deskritti fil-Viżjoni Malta 2050 u l-Politika Nazzjonali dwar l-Impjiegi 2021–2030. Il-miżuri għal soċjetà ġusta u ekwa jinkludu l-bżonn tal-politiki ta’ integrazzjoni sabiex nibnu soċjetà reżiljenti fejn l-individwi kollha, irrispettivament minn fejn huma ġejjin, iħossuhom apprezzati u inklużi.
Il-viżjoni tal-GWU hija dik ta’ Malta li tgħin lil dawk li għadhom jaslu biex jadattaw għall-ambjent il-ġdid tagħhom, permezz tal-aċċess għall-edukazzjoni, it-taħriġ fil-lingwi, l-opportunitajiet ta’ impjieg, u s-servizzi soċjali. Billi nħaddnu d-diversità u niżguraw aċċess ugwali għall-opportunitajiet u r-riżorsi, nistgħu nsawru futur ta’ armonija soċjali.
Tipproponi wkoll kontinwità fis-sussidji tal-enerġija, fjuwil u ċereali biex tinżamm l-istabbiltà tal-prezzijiet, modernizzazzjoni tal-COLA u monitoraġġ indipendenti tal-prezzijiet wara l-aġġustament, tisħiħ tal-pensjonijiet u infurzar ta’ ġbir tal-kontribuzzjonijiet soċjali, żieda fil-benefiċċji soċjali, trasferiment ta’ kontribuzzjonijiet bejn konjuġi u eliġibbiltà doppja tal-pensjoni għall-miżżewġin superstiti; investiment fl-għarfien f’saħħa mentali u kura primarja u miżuri konkreti għall-affordabbiltà tad-djar fost oħrajn.
B’ħarsa lejn il-futur, il-GWU tipproponi biex flimkien nipprijoritizzaw il-benesseri u l-produttività tal-ħaddiema lil hinn mis-sigħat maħduma, biex inwasslu titjib tanġibbli fil-bilanċ bejn ix-xogħol u l-ħajja privata, is-saħħa mentali u fiżika, u l-parteċipazzjoni ċivika. Is-settur pubbliku jista’ jmexxi b’eżempju, sabiex juri l-valur soċjali u ekonomiku tal-bidla.
Fl-aħħar mill-aħħar, il-proposti tal-GWU huma diretti sabiex ikun hemm investiment strateġiku fil-kapital uman u r-reżiljenza tas-soċjetà ta’ Malta, tissaħħaħ il-ġustizzja soċjali filwaqt li tinżamm il-kompetittività, ikun imħares il-purchasing power tal-familji, jissaħħaħ l-għarfien tas-saħħa mentali u l-kura primarja. Dan kollu huwa marbut u mibni fuq is-suċċess u tkabbir li Malta qed tesperjenza matul dan il-perjodu, f’allinjament sħiħ mal-viżjoni fit-tul.
