Minn Cristian Muscat
Kif bdiet l-imħabba tiegħek lejn il-waterpolo?
L-imħabba tiegħi għall-waterpolo bdiet meta bdejt nara lil ħija jittrejna fil Pixxina tas-Sirens u gabitli l-interes li nkun tajjeb daqsu u jekk mhux aħjar.
X’tikkummenta fuq ir-rebħ tad-Double permezz tal-Kampjonat u n-Knockout tal-Ewwel Diviżjoni minn Marsaxlokk ASC?
Għalkemm għalija kien staġun diffiċli b’ħafna problemi personali, xorta ninsab kburi ħafna bija nnifsi u b’sħabi tat-tim talli għamilna l-istorja u bqajna mingħajr telfa. Nittama wkoll li nistgħu nieħdu din l-esperjenza u naraw fejn teħodna fil-Kampjonat Premier.
Iddeskrivi l-esperjenza preżenti tiegħek ma’ Marsaxlokk ASC.
L-esperjenza tiegħi ma’ Marsaxlokk ASC hija xi ħaġa vera speċjali kif ukoll unika minħabba li għandna kowċis u klabb li għandhom tant fiduċja fil-potenzjal tiegħi. Napprezza ħafna d-deddikazjoni tal-kowċis tagħna, Sasa Misic u Aleksander Ciric u plejers barranin (Nikola Bogdanovic) li għallmuni tant matul dawn l-erba’ snin kemm bħala plejer fil-logħba tal-waterpolo, kif ukoll bħala persuna.
X’tikkummenta fuq il-kowċ, Sasa Misic?
Onestament, huwa wieħed mill-aqwa jekk mhux l-aqwa kowċ li qatt kelli, sempliċament minħabba li jaf kif għandu jilqa’ lill-skwadra u anke lill-plejer wara logħba ħażina jew tajba. Nemmen ukoll li l-kowċ Sasa Misic mhuwiex tajjeb minħabba rebħ tal-logħob u tat-Tazzi biss imma wkoll fuq kif jista’ jadatta l-aħjar tattiċi għal kull persuna u pożizzjoni fit-tim li tgħinna nirbħu l-logħob u t-Tazzi.
U fuq il-kumitat immexxi mill-president, Victor Fenech?
Ir-riżultat jitkellem għalih innifsu. Ġabu kowċ u plejers barranin li dejjem tawna l-aqwa għajnuna kull staġun, u naħseb li kieku m’għamlux li għamlu għalina….aħna nkunu f’pożizzjoni differenti.
Kif tqis il-livell tal-waterpolo Malti fil-preżent?
Fl-opinjoni tiegħi, il-livell tal-waterpolo f’Malta qed isir aħjar wara kull sena, minħabba l-Kampjonat tas-Sajf bil-plejers barranin, il-Final 4 taċ-Champions League u logħbiet tat-tim nazzjonali Malti fuq livell Ewropew u globali. Għalkemm sejrin għall-aħjar xorta nemmen li għad hemm bżonn progress biex il-waterpolo isir l-isport nazzjonali ta’ Malta u biex jiġbed l-attenzjoni tan-nies.
U dak tar-riżorsi (pixxini) fejn titħarrġu u tilagħbu l-logħob kompetittiv tagħkom?
Jien naħseb li l-Gvern ħa avviż minħabba il-bidliet drastiċi fejn hawn iktar ħin biex titħarreġ, iktar aċċess, u l-kwalitá tat-taħriġ tjieb drastikament. Għalkemm hemm ħafna titjib, nixtieq nara aktar appoġġ u aktar ftuħ ta’ klabbs.
Kif qed tħares lejn il-futur tiegħek fil-waterpolo?
Inħoss li għandi ħafna aktar x’nikseb fis-snin li ġejjin kif ukoll ħafna aktar x’nipprova lili nnifsi u lil kulħadd. Ma naħsibx li lħaqt il-potenzjal sħiħ tiegħi u għad għandi triq twila x’nimxi ‘l quddiem. Irrid nirringrazzja wkoll u ngħid li jien grat ħafna għall-opportunità li tawni Neptunes u Marsaxlokk matul dawn l-erba’ snin meraviljużi.
Għaddi messaġġ finali lil min jixtieq jibda jilgħab il-waterpolo.
Li tibda tilgħab il-waterpolo żgur jista’ jħossu diffiċli għall-ewwel, huwa sport ta’ intensità għolja li jisfida l-kundizzjoni fiżika, il-koordinazzjoni, u l-mentalità tiegħek f’daqqa. Jista’ saħansitra jidher intimidanti fil-bidu.
Imma jekk tibqa’ hekk, malajr tirrealizza kemm hu sodisfaċenti. Il-waterpolo mhux biss jibni s-saħħa fiżika, iżda wkoll ir-reżiljenza, il-ħidma f’tim, u d-dixxiplina.
Jiftaħ il-bibien kemm jekk ikun ivvjaġġar, kompetizzjoni f’livelli għoljin, jew formazzjoni ta’ ħbiberiji tul il-ħajja. Il-vjaġġ mhux dejjem faċli, iżda l-potenzjal li għandu dan l-isport huwa enormi. Tista’ tispiċċa tikseb aktar milli qatt immaġinajt!
