Fl-aħħar sigħat in-nirien kbar f’Kalifornja, magħrufa bħala Washburn Fire, jidher li rduppjaw fid-daqs u s’issa diġà qerdu 1,591 ettaru ta’ art. Dawn in-nirien qegħdin ikunu ta’ theddida kbira għall-Park Nazzjonali ta’ Yosemite li huwa wieħed magħruf ħafna.
Siġra partikolari li hemm fl-imsemmi park hija kkalkulata li għandha madwar 3,000 sena u hija magħrufa bħala Grizzly Giant. S’issa fortunatament din għadha ma ġietx mittiefsa min-nirien.
Bħalissa l-pumpieri qegħdin jaħdmu bla heda f’din iż-żona bil-għan li jipproteġu wħud mill-ikbar u l-eqdem siġar tal-injam aħmar fid-dinja.
Residenti u anke persuni li kienu qed jikkampjaw fiż-żona kellhom jiġu evakwati hekk kif duħħan iswed beda jagħmel il-kwalità tal-arja perikoluża.