Il-kompetituri Maltin temmew ir-raba’ jum u t-tielet stadju tal-Absa Cape Epic, u issa waslu nofs triq f’dik li hija meqjusa bħala waħda mill-aktar kompetizzjonijiet tal-mountain bike diffiċli fid-dinja.
Dan l-istadju — l-itwal tal-Cape Epic — ra lill-parteċipanti jitilqu minn Montagu lejn Greyton fuq rotta ta’ 140km li kienet tinkludi 1,750 metru t’elevazzjoni. Kundizzjonijiet imsaħħbin u bir-riħ offrew xi ftit serħan mis-sħana tal-ġranet preċedenti, għalkemm il-korsa baqgħet waħda ferm impenjattiva.
Epic Team Deloitte (Mark Bonnici / Luke Borg), wara stadju diffiċli lbieraħ fejn ma kinux fl-aqwa tagħhom, wrew reżiljenza u temmew il-korsa f’ħin ta’ 6:04:27.3. Minkejja li għadhom mhux irkupraw kompletament, huma irnexxielhom jimmaniġġjaw l-isforz tagħhom b’għaqal. L-istadju tal-lum kien adatt għalihom, b’sezzjonijiet ta’ toroq ċatti u biż-żrar u singletrack li ppermettewlhom jieħdu vantaġġ mill-ħiliet tat-time trial tagħhom u jżommu ritmu medju b’saħħtu — u b’hekk kisbu riżultat aħjar milli mistenni.
“Li nżommu idratati baqgħet prijorità tul l-istadju kollu, speċjalment minħabba li l-ikel solidu kien diffiċli biex jiġi diġerit taħt dawn iċ-ċirkustanzi,” ikkummenta Bonnici.
Team Gaudos (Stephen Grima / Brandon Sultana) segwew mill-qrib, u temmew f’6:09:05.9. Jikkummenta dwar il-prestazzjoni tal-ġurnata, Grima qal: “L-istadju twil qablilna llum. Żammejna ritmu b’saħħtu matul l-ewwel żewġ terzi, u użajna l-esperjenza tas-sena li għaddiet biex nindirizzaw l-aħħar terz b’mod aktar konservattiv, b’enfasi fuq irkupru għall-jiem li ġejjin. Peress li għadna nofs triq biss, huwa importanti li timmaniġġja l-isforz fuq stadju ta’ 140km bħal dan, aktar milli timbotta b’intensità massima tul kollu. B’mod ġenerali, ninsabu sodisfatti bil-prestazzjoni u l-ħin miksub — għad hemm fejn intejbu, iżda l-prijorità tibqa’ li nkunu konsistenti u naħdmu b’mod intelliġenti.”
Team Kalamba Racing temmew il-korsa f’6:40:45.3, b’Etienne Bonello jiddeskrivi l-istadju bħala “wieħed mimli tajn u b’toroq li donnhom ma jispiċċaw qatt — speċjalment lejn l-aħħar.” Wara l-isforzi intensivi tal-aħħar jiem, l-għeja bdiet tinħass, u dan jagħmel il-ġestjoni tal-pass aktar kruċjali b’erba’ stadji oħra diffiċli li għadhom ġejjin. Kif qal Bonello, “għada nkomplu, iżda bil-ħsieb li nofs it-triq diġà għaddiet.”
Fil-klassifika ġenerali, Epic Team Deloitte raw tibdil żgħir fil-pożizzjonijiet wara l-istadju diffiċli ta’ lbieraħ, iżda rkupraw tajjeb u kisbu lura xi pożizzjonijiet illum. Sadanittant, Team Gaudos qed ikomplu jitilgħu b’mod konsistenti fil-klassifika ta’ grupp li fiħkompetizzjoni qawwija min 173 tim. Fil-kategorija Mixed, Team Kalamba Racing qed iżommu momentum pożittiv u bħalissa jinsabu fit-22 post minn 61 tim parteċipanti.
Issa l-attenzjoni ddur fuq l-istadju ta’ għada f’Greyton, fejn għada l-parteċipant se jiffaċċjaw rotta iqsar ta’ 87km. Minkejja d-distanza iqsar, l-istadju xorta se jinkludi diversi telgħat impenjattivi, li jfissru li l-isfida tibqa’ waħda sostanzjali.
Epic Team Deloitte (Luke Borg & Mark Bonnici) huma sponsorjati minn Deloitte b’appoġġ addizzjonali minn Foster Clark Products, Akkura u Visit Malta, b’aktar appoġġ minn Nduranz, The Cyclist u Wheel Wizard.
Team Gaudos (Stephen Grima & Brandon Sultana) huma appoġġjati minn Extra Carte, Visit Malta, SG Woodworks Ltd, Raico, National Gypsum Limited Malta, Wurth Malta, Pitre Hardware, Lourdes Opticians, JV Pharma, A. Caruana Enterprises Ltd u Xlendi Supermarket.
Team Kalamba Racing (Etienne Bonello & Marie Claire Aquilina) huma sponsorjati minn Kalamba Games, b’appoġġ addizzjonali minn Garmin u Visit Malta. Il-partners tekniċi jinkludu 226ERS, Ascend Creative Studio, BBB Cycling, IDMatch Bikefit Lab, The Sports Medics, Tristar Travel u Würth.