Novak Djokovic jista’ jkun qed jiffaċċja aktar inkwiet fil-Grand Slam li jmiss – wara li Franza insistiet li mhux se tħalli persuni mhux imlaqqmin jidħlu f’areni sportivi.
L-Open ta’ Franza huwa l-Grand Slam li jmiss fil-kalendarju tat-tennis li jsir f’Mejju u Djokovic kien mistenni li jipparteċipa mingħajr kumplikazzjonijiet – iżda l-Covid Pass il-ġdid biddel dan.
Il-Parlament ta’ Franza vvuta b’215 kontra 58 biex tagħti l-approvazzjoni finali għal pass ta’ vaċċin li se jeskludi lil dawk mhux imlaqqma minn ristoranti, areni sportivi u postijiet oħra. Din se tapplika għal kull min għandu aktar minn 16-il sena u l-liġi tidħol fis-seħħ dalwaqt.
Din titfa’ dubju fuq il-parteċipazzjoni ta’ Djokovic f’Roland Garros.
Kelliemi għall-gvern Franċiż: “L-imġieba ta’ Djokovic kienet irresponsabbli. L-Awstralja hija pajjiż sovran u r-regoli għandhom jiġu rispettati.
“Ma nistgħux ikollna żewġ piżijiet u żewġ miżuri rigward il-Covid Pass. Kulħadd irid jirrispetta r-regoli.
“L-avvenimenti kbar kollha li se jsiru fi Franza se jadottaw il-Covid Pass. “
L-aħbar tasal wara li Djokovic ġie deportat mill-Awstralja wara li l-viża tiegħu tħassret mill-awtoritajiet fil-pajjiż. Huwa kien ipprojbit mill-pajjiż għal tliet snin.
Djokovic ħalla l-Awstralja tard il-Ħadd filgħaxija wara li 12-il jum ta’ battibekki legali li raw liċ-champion tat-tennis fl-aħħar jeżawrixxi l-għażliet kollha, bil-bank sħiħ tal-Qorti Federali jaqbel mad-deċiżjoni tal-Ministru tal-Immigrazzjoni tal-Awstralja, Alex Hawke, li jħassar il-viża.
