Novak Djokovic m’għandu l-ebda intenzjoni li jgħaddi t-torċa lill-ġenerazzjoni li jmiss għalissa, bis-Serb ta’ 36 sena qed juri li l-età hija biss numru billi sar l-ixjeħ player fl-Era Open li għolla t-trofew tal-US Open nhar il-Ħadd ta’ qabel.
B’Roger Federer irtirat u Rafael Nadal li jweġġa’ spiss, lest li jieqaf wara l-istaġun li ġej, il-ġranet tal-‘Big Three’ ilhom li għaddew iżda Djokovic – il-membru finali ta’ dik it-triloġija – fakkar lill-partitarji fi New York li jinsab ‘il bogħod milli jirtira.
Ir-rebħa tiegħu ta’ 6-3 7-6 (7-5) 6-3 fuq ir-Russu Daniil Medvedev ġabitlu mhux biss ir-raba’ titlu fi Flushing Meadows iżda l-24 titlu ta’ Grand Slam b’rekord ta’ ugwaljanza, iżda Djokovic irid aktar.
“Kultant nistaqsi lili nnifsi, għaliex għandi bżonn dan, xorta, f’dan l-istadju wara dak kollu li għamilt, taf int. Kemm irrid nibqa’ għaddej? Jien għandi dawn il-mistoqsijiet f’rasi, ovvjament,” qal Djokovic.
“Meta naf li nilgħab f’livell daqshekk għoli, xorta u nirbaħ l-akbar tournaments f’dan l-isport, iva, ma rridx neħles minn dan l-isport jew ma rridx inħalli dan l-isport jekk għadni fil-quċċata. Għadni nħossni mmotivat u għaldaqstant mimli enerġija.”
Djokovic iddomina kontra talenti taż-żgħażagħ Amerikani, meta għeleb lil Taylor Fritz u Ben Shelton fi triqtu lejn il-finali. Iżda f’Medvedev, huwa ltaqa’ ma’ avversarju b’aktar esperjenza, u pprovdielu opportunità għall-fidwa. Sentejn qabel, ir-Russu kien waqqaf l-insegwiment tiegħu ta’ Grand Slam kalendarju f’dak l-istess court.
