L-offerta tal-president ta’ Hamrun Spartans, Joseph Portelli, biex jixtri lil Siena Calcio ġiet miċħuda mill-klabb Taljan tas-Serie D.
Rapport fuq Gazzetta Di Siena qal li l-klabb Taljan tas-Serie D irċieva offerta ta’ €1.3 miljun mingħand J.P. Portelli Group biex jieħu f’idejh it-tmexxija tat-tim Taljan. Madankollu, l-uffiċjali għolja ta’ Siena Calcio rrifjutaw l-offerta.
Ir-rapport qal li J.P. Portelli Group inizjalment kien għamel offerta biex jieħu kontroll sħiħ tal-klabb għal €1 miljun.
Suċċessivament, fi sforz biex itaffi l-pożizzjoni tas-sidien ta’ Siena Calcio, Portelli nieda t-tieni offerta ta’ €1.3 miljun.
Ir-rapport qal li l-klabb Malti jista’ jkompli jinnegozja mal-amministrazzjoni għolja ta’ Siena Calcio u ma eskludiex li tista’ tiġi offruta t-tielet offerta ta’ €1.5 miljun.
Skont ir-rapport, il-president ta’ Siena Jonas Bodin, negozjant Żvediż, mhuwiex interessat li jbigħ il-klabb iżda jkun miftuħ biex jilqa’ msieħba ġodda.
Gazzetta Di Sicilia rrappurtat li Portelli, negozjant Malti tal-kostruzzjoni magħruf sew, ippreżenta proġett sportiv serju mmirat biex jipprovdi aktar stabbiltà finanzjarja lill-klabb, u programm tekniku sod għall-klabb li għaddej minn żminijiet diffiċli f’dawn l-aħħar snin.
Skont ir-rapport, Portelli huwa ħerqan li jinvesti fil-klabb, partikolarment fis-settur tal-youths, biex jipprova jgħin lil Siena jitilgħu għal diviżjonijiet ogħla fil-futbol Taljan. Il-ħolma ta’ Portelli hija li jmexxi klabb Taljan mid-diviżjonijiet ta’ livell aktar baxx għas-Serie A Taljana.
