Meta kien fadal 10 ijiem biss għall-ftuħ tal-Logħob Olimpiku tas-Sajf ta’ Pariġi 2024, il-Kumitat Olimpiku Malti ħabbar li t-tiratur Gianluca Chetcuti u l-għawwiema Sasha Gatt se jkunu qed iġorru l-bandiera ta’ Team Malta waqt iċ- Ċerimonja tal-Ftuħ ta’ nhar il-Ġimgħa li ġej, 26 ta’ Lulju.
Din iċ-ċerimonja storika se ssir fuq is-Seine, fejn dgħajjes li jġorru kull delegazzjoni nazzjonali se jivvjaġġaw rotta ta’ sitt kilometri quddiem it-Trocadero, li tilħaq il-qofol tagħha fi protokoll u wirjiet Olimpiċi finali.
Chetcuti, li se jiddebutta f’dawn il-Logħob, beda l-karriera internazzjonali tiegħu fl-2014, fejn rebaħ midalja tal-bronż tal-Junior f’Double Trap fit-Tazza tan-Nazzjonijiet Taljani. Iktar tard rebaħ id-deheb fil-Logħob tal-Pajjiżi ż-Żgħar tal-2017 u l-bronż fil-Kampjonati Ewropej. Fl-2019, qaleb għat-Trap u waqqaf rekord ġdid Malti fil-Logħob Ewropew tal-2023.
Gatt, kienet waħda mill-iżgħar Olimpiċi ta’ Malta fil-Logħob ta’ Tokyo fl-2021. Ta’ 13-il sena, hija stabbiliet rekord nazzjonali ta’ short course fit-800 metru freestyle fil-Ġermanja. Il-wirjiet konsistenti tagħha kisbula l-ogħla punti tal-FINA, u b’hekk għamluha l-għawwiema femminili f’Malta bl-ogħla ranking
Jikkomplimentaw lil Team Malta huma l-atleta tat-track, Beppe Grillo, il-judoka Katryna Esposito u l-għawwiem Kyle Micallef, li kollha se jagħmlu d-debutt Olimpiku tagħhom.
Waqt il-preżentazzjoni tal-bandiera Maltija lil Chetcuti u Gatt kien hemm membri tal-midja kif ukoll rappreżentanti tal-APS Bank li appoġġjaw lill-atleti ta’ Team Malta fit-tħejjija għal dawn il-Logħob.
Il-President tal-KOM, Julian Pace Bonello, laqa’ lill-atleti, esprima l-awguri mill-qalb tiegħu u nnota d-dedikazzjoni, il-perseveranza u l-eċċellenza tagħhom li wassluhom għal dan l-istadju tal-karriera sportiva tagħhom.
“Hekk kif titilgħu fuq il-palk Olimpiku, ftakru li intom mhux biss atleti, iżda ambaxxaturi ta’ Malta. Ikkompetu bil-passjoni, l-integrità u r-reżiljenza li tiddefinixxi gżiritna”, irrimarka s-Sur Pace Bonello.
Huwa kompla esprima l-gratitudni tiegħu lejn APS Bank, SportMalta, NDS, KM Malta Airlines u Olympic Solidarity għall-kontribuzzjonijiet finanzjarji tagħhom li għenu lill-atleti fil-preparamenti tagħhom għal dawn il-Logħob.
IL-MALTIN FL-AZZJONI
L-impenji Olimpiċi ta’ Team Malta jibdew nhar is-Sibt, 27 ta’ Lulju, meta l-judoka Katryna Esposito tieħu sehem fl-avveniment ta’ -48kg, segwita mill-avvenimenti ta’ kwalifikazzjoni ta’ Gianluca Chetcuti fl-isparar nhar it-Tnejn, 29, u l-għada t-Tlieta, 30 ta’ Lulju.
Sasha Gatt se tkun fil-Pixxina Olimpika biex tieħu sehem fil-heats tal-1500m freestyle nhar it-Tlieta, 30 ta’ Lulju.
Imbagħad nhar il-Ħamis, l-1 ta’ Awwissu, l-għawwiem Kyle Micallef se jieħu sehem fil-heats tal-50m.
Fl-atletika, Beppe Grillo se jidħol fl-azzjoni fir-round preliminari tal-100m nhar il-Ħadd, 3 ta’ Awwissu.
