Olympiakos …….1
Fiorentina ………0
(wara l-ħin barrani)
Olympiakos saru l-ewwel team Grieg li rebaħ unur Ewropew meta fil-finali tal-UEFA Conference League għelbu lil Fiorentina bl-iskor ta’ 1-0 liema partita marret fil-ħin barrani.
Din il-logħba ma laħqitx l-aspettattivi mixtieqa minħabba li wara bidu veloċi, iż-żewġ timijiet għażlu li jikkanċellaw lil xulxin aktar milli jmorru fuq l-offensiva.
Fl-ewwel sitt minuti, Daniel Podence għal Olympiakos u Andrea Belotti għal Fiorentina setgħu fetħu l-iskor.
Aktar minn hekk, fl-10 minuta, dawn tal-aħħar sabu x-xibka iżda l-goal ġie mħassar meta Nikola Milenkovic għeleb lill-goalkeeper, Konstantinos Tzolakis, iżda l-iskorer kien f’pożizzjoni ta’ offside.
Fil-21 minuta, il-Viola setgħu għamlu aħjar meta minn pożizzjoni ideali, Giacomo Bonaventura xxuttja ferm dgħajjef biex Tzolakis salva mingħajr wisq tbatija.
Anke jekk Olympiakos gawdew aktar mill-pussess tal-ballun, Fiorentina kienu aktar perikolużi u f’temp ta’ żewġ minuti, fl-24 u fil-25 minuti, resqu viċin permezz ta’ Belotti, li sab lil Tzolakis jinnewtralizza fil-ħin u minn Nicolas Gonzalez li t-tentattiv tiegħu ġie mblukkat mid-difiża Griega.
Minuta wara, kien il- goalkeeper ta’ Fiorentina, Pietro Terracciano, li salva d-daqqa ta’ ras ta’ Podence minn azzjoni ta’ corner.
Fil-41 minuta, l-istess Terracciano ħareġ minn postu biex antiċipa lill-attakkant avversarju, Ayoub El Kaabi, li iżda spiċċaw it-tnejn mal-art u b’xorti tajba ħadd minnhom ma weġġa’.
Fil-ftuħ tat-tieni taqsima, iż-żewġ timijiet ippruvaw joħorġu fuq l-offensiva jfittxu dak il-goal importanti … u fis-56 minuta, Fiorentina qabdu fuq sieq lid-difiża avversarja mill-free-kick ta’ Cristiano Biraghi iżda l-periklu ġie kklerjat fil-ħin.
Fit-68 minuta, Christian Kouame naqas li jiftaħ l-iskor għat-Taljani meta mill-pass ta’ Dodo, ma għamilx kuntatt mal-ballun biex il-goalkeeper Tzolakis salva fil-pront.
Fil-75 minuta, il-midfielder ta’ Olympiakos,Vicente Iborra, ra d-daqqa ta’ ras tintemm ftit barra … u wara din l-azzjoni ż-żewġ goalkeepers rari kienu mpenjati biex il-logħba intemmet fi draw u kellu jingħata l-ħin barrani.
Fl-94 minuta, il-Griegi appellaw għal penalty meta l-ballun deher jagħmel kuntatt minimu ma’ id Antonin Barak iżda kien kollox normali għall-uffiċjal tal-logħba.
Fil-110 minuta, Tzolakis kien providenzjali għall- Griegi meta salva x-xutt ta’ Jonathan Ikone.
Fil-116-il minuta, Olympiakos skorjaw il-goal li tahom it-tazza meta Ayoub El Kaabi kkonkluda bir-ras mill-cross ta’ Santiago Hezze.
