Tina Papworth, omm ta’ 53 sena minn Essex, li trabbi 20 tifel u tifla saret taf li għandha kanċer f’moħħha wara li għamlet test tal-għajnejn bħala parti minn rutina.
Għall-bidu hija ġiet riferuta biex tmur fi klinika tal-għajnejn u hemmhekk tawha xi mediċina apposta għal għajnejha. Iżda f’Marzu li għadda sarulha aktar testijiet fosthom MRI u hemm irriżulta li kellha kanċer kbir f’moħħha.
Hija tgħid li kif kienet bilqiegħda u tawha l-aħbar tal-kanċer għajnejha mtlew bid-dmugħ u nfaqgħet tibki. Għaliha dan kollu kien bħal sajjetta fil-bnazzi u ma kinitx taf x’ser taqbad tagħmel.
L-omm issa qed tistenna li ssirilha operazzjoni f’Ġunju. Hija tgħid li tħossha pożittiva minħabba l-fatt li ntebħu kmieni biżżejjed għalhekk l-operazzjoni tista’ tkun ta’ suċċess. L-omm għandha żewġt itfal bijoloġiċi filwaqt li hija wkoll foster ta’ 18 oħra. Hija tgħid li għalkemm kulħadd ikollu l-mumenti tiegħu, hija lesta li tiġġieled kontra din il-battalja. Hija trid li wliedha jarawha pożittiva u determinata u mhux il-kontra.
L-omm issa qed taħdem mal-għaqda Charity Brain Tumour Research biex tkun tista’ taqsam l-istorja tagħha u tagħmel aktar kuraġġ lil min għaddej minn esperjenzi simili ta’ mumenti diffiċli bħal dawn.
