Illum fis-Sala taċ-Ċentinarju f’Ta’ Qali, issejħet l-ewwel laqgħa tal-Bord Eżekuttiv tal-Malta FA għall-Istaġun 2023/24, wara l-elezzjoni tagħha waqt l-Assemblea Ġenerali ta’ Lulju għall-mandat ta’ sentejn. Il-bord mistenni jkompli jfassal il-kors strateġiku u regolatorju għall-futbol Malti.
Waqt il-laqgħa, il-president tal-Malta FA Bjorn Vassallo fakkar lill-membri fid-drittijiet u l-obbligi tagħhom fi ħdan il-korp deċiżjonali. Fl-indirizz tiegħu, huwa enfasizza l-importanza tal-kollaborazzjoni u l-għaqda biex jitmexxa ‘l quddiem l-isport. Vassallo irrimarka, “L-għan tagħna huwa li nippromwovu u nipproteġu l-interessi tal-klabbs u l-assoċjazzjonijiet membri tagħna kollha. Aħna qegħdin hawn biex niżguraw li l-futbol f’Malta jiffjorixxi, u għal dan, kull membru għandu jikkontribwixxi b’mod attiv u jżomm ir-responsabbiltajiet tiegħu.”
Il-Bord Eżekuttiv tal-Malta FA, bil-kompożizzjoni diversa tiegħu li tirrappreżenta interess differenti fil-logħba, għandu l-potenzjal li jġib bidliet pożittivi f’diversi aspetti tal-futbol Malti. Il-fokus strateġiku tiegħu huwa mistenni li jinkludi oqsma bħall-iżvilupp taż-żgħażagħ, it-titjib tal-infrastruttura, il-bilanċ kompetittiv, u t-tkabbir ġenerali tal-isport.
Dispożizzjonijiet Importanti għan-Nisa fil-Kuntratti tal-Futbol Professjonali
Waqt il-laqgħa, il-Bord approva sett ta’ regolamenti relatati ma’ plejers professjonali nisa. Dawn ir-regolamenti jallinjaw mar-regoli eżistenti tal-FIFA li għandhom l-għan li jippromwovu l-ugwaljanza bejn is-sessi u jappoġġaw lin-nisa fil-karrieri tagħhom bħala atleti.
B’mod sinjifikanti, plejers nisa se jkunu intitolati għal-leave tal-maternità (maternity leave) matul iż-żmien tal-kuntratt tagħhom. Il-klabbs se jkollhom ukoll il-possibbiltà li jirreġistraw plejer barra mill-perjodi ta’ reġistrazzjoni regolari biex jieħu post temporanjament plejer femminili oħra li tkun ħadet il-leave tal-maternità.
Taħt dawn ir-regoli, kull terminazzjoni unilaterali ta’ kuntratt minn klabb ibbażat fuq it-tqala, il-leave tal-maternità, jew drittijiet relatati ta’ plejer se titqies bħala mhux ġustifikata. L-atleti nisa se jingħataw ċerti drittijiet waqt it-tqala, inkluż id-determinazzjoni tal-livell ta’ aċċess għal servizzi sportivi fuq il-bażi ta’ parir mediku, opportunitajiet għal impjieg alternattiv, id-dritt li jerġgħu lura għall-attività, u l-possibbiltà li jreddgħu, biex b’hekk titrawwem ambjent inklussiv u ta’ appoġġ … ambjent għall professjonisti nisa fl-industrija tal-isport.
Aġġornamenti oħra regolatorji
Fost ir-regolamenti li approva l-Bord, kien hemm aġġornamenti għar-Regolamenti dwar il-Liċenzjar tan-Nursery u l-introduzzjoni tar-Regolamenti tal-Aġenti tal-Futbol, li huma bbażati fuq ir-riforma riċenti ta’ dan is-settur li saret fil-livell tal-FIFA.
