Osasuna tkeċċew mill-UEFA Conference League għall-istaġun li ġej liema kastig ingħata wara li nstabu ħatja li għaxar snin ilu kienu nvoluti f’korruzzjoni li nfluwenzat bosta riżultati.
Il-UEFA ddikjarat lill-club Spanjol bħala “ineliġibbli” biex jipparteċipa fit-tielet livell tal-football Ewropew għall-2023/24.
Osasuna spiċċaw fis-seba’ post f’La Liga l-istaġun li għadda wara li għelbu lil Athletic Bilbao fl-aħħar ġurnata biex kisbu l-kwalifikazzjoni b’żewġ punti.
Madankollu l-club Spanjol mhux se jitħalla jilgħab fil-kompetizzjoni li fl-istaġun li għadda ntrebħet minn West Ham.
Stqarrija maħruġa mill-UEFA kienet tgħid:
“Il-club ta’ Osasuna ġie mgħarraf bil-konklużjonijiet tar-rapport imfassal mill-ispetturi tal-Kumitat ta’ Kontroll, Etika u Dixxiplina tal-UEFA.
“F’dan ir-rapport, l-ispetturi jiddikjaraw ‘l-ineliġibbiltà tal-club biex jipparteċipa fil-UEFA Conference League 2023-2024’, u b’hekk iċaħħdulu d-dritt li jipparteċipa f’kompetizzjonijiet Ewropej li jkun kiseb b’mod ġust fil-ground.
“Ir-raġuni tmur lura għal xi avvenimenti li seħħew fl-istaġun 2013-14 u li, fl-opinjoni tal-UEFA, kisru l-artiklu tagħha 4.1g tar-regolamenti tal-kompetizzjoni.”
Osasuna kkonfermaw li se jappellaw minn din is-sospensjoni mposta mill- UEFA.
Huma żiedu: “Qawwija mad-dgħajjef u dgħajfa mal-qawwi.
“Il-qrati tal-UEFA ma ridux iqisu li kienu l-qrati Spanjoli nfushom li litteralment iddikjaraw li Osasuna kienu vittmi tad-devjazzjoni ta’ flus li twettaq minn uħud mill-eks diretturi tagħhom minn wara l-ogħla korp ta’ tmexxija tal-entità, l-Assemblea, u l-mekkaniżmi ta’ kontroll tal-club innifsu.”
Il-club stqarr li huwa jinsab “ippreparat għal dak kollu li jista’ jinqala’” iżda saħaq li huma “qatt ma huma se jaqtgħu qalbhom.” L-istess club baqa’ jinsisti li huma kisbu posthom fil-Conference League b’mod meritat.
Jekk l-appell ma jintlaqax, ikunu Athletic Bilbao li jiġu aċċettati.
L-iskandlu in kwistjoni ġie msejjaħ Caso-Osasuna u spiċċa bl-eks president tal-club, Miguel Archanco, u ħames eks diretturi ta’ clubs oħra kkundannati l-ħabs.
B’riżultat ta’ dan, il-qorti sabet €650,000 fondi tal-club kienu diretti biex jitħallsu players minn timijiet oħra biex jinfluwenzaw ir-riżultati.
