Oscar Hiljemark twieled fil-belt Svediża ta’ Gislaved nhar it-28 ta’ Ġunju 1992 u llum għandu 29 sena. Hu ex player tal-football mat-team nazzjonali Svediż kif ukoll ma’ diversi clubs domestiċi u internazzjonali.
Hiljemark beda l-karriera tiegħu tal-istess belt fejn twieled fejn sal-etá ta’ 16-il sena kompla jiżviluppa l-ħiliet tiegħu f’dan l-isport.
Sena wara ġew għalih IF Elfsborg sabiex fl-2008 meta kellu 18-il sena ffirma l-ewwel kuntratt professjonali ma’ dan it-team. Kienu sentejn ferm intensivi għalih fejn mill-ewwel deher il-potenzjal tiegħu f’nofs il-ground tant li kien involut f’61 partita fiż-żmien li lagħab magħhom.
Il-kapaċitajiet tiegħu fil- midfield bdew jimpressjonaw lil diversi scouts li bdew jarawh u ma kinitx sorpriża li l-ġganti Olandiżi PSV Eindhoven ikkuntattjawh sabiex joffrulu kuntratt magħhom. Huwa lagħab 49 partita mat-team mill-belt Olandiża u skorja żewġ goals.
Fl-2015 bdiet avventura ġdida għalih hekk kif ingħaqad ma’ Palermo fl-Italja li dak iż-żmien kienu jilagħbu fis-Serie A. Staġun minnhom hu kien misluf ukoll lil Genoa sabiex sena wara ffirmawh magħhom.
Hiljemark jgħid li l-esperjenza Taljana kienet l- aktar waħda produttiva tal- karriera tiegħu tant li f’erba’ snin lagħab 106 partiti.
L-aħħar parti tal-karriera tiegħu għamilha b’self ma’ Panathinaikos fil-Greċja u Dynamo Moscow fir-Russja sabiex fl-istaġun li għadda ffirma ma’ Aalborg tad-Danimarka.
Huwa ffirma kuntratt ta’ erba’ snin għalkemm b’xorti ħażina kellu jdendel iż-żarbun tal-football aktar kmieni milli mistenni minħabba injuries ripetuti li kien qed ikollu f’dawn l-aħħar snin. B’hekk hu tkellem mal-club Daniż u ġie deċiż li sa minn dan l-istaġun kien se jokkupa l-kariga ta’ assistant coach.
Hiljemark irrappreżenta lil pajjiżu 28 darba u skorja żewġ goals. Huwa pparteċipa wkoll f’żewġ avvenimenti kbar – l-Euro 2016 u t-Tazza tad-Dinja 2018.
F’dawn l-aħħar jiem, l- assistant coach ta’ Aalborg kien f’pajjiżna fejn it-team tiegħu pparteċipa fit-Tip Sport Malta 2022 fejn spiċċa fit-tielet post tal-klassifika.
Dan il-ġurnata ltaqa’ ma Hiljemark fejn qasam l-esperjenzi tiegħu.
Kif bdiet l-imħabba tiegħek lejn il-football?
Minn dejjem kont inħobb il-football. Apparti li kont nara ħafna logħbiet fuq it-televiżjoni, dejjem kont immur il-ground filwaqt li nilgħab dik il-logħba football ma’ sħabi.
Il-ġenituri tiegħi ma ridux iċaħħduni minn dan il-passatemp li kelli u meta kelli seba’ snin irreġistawni ma’ Gislaveds IS, team li ġej minn belt twelidi stess. Nistqarr li magħhom tgħallimt ħafna fejn qattajt disa’ snin ferm sbieħ.
Darba fost l-oħrajn, ġew xi scouts ta’ IF Elfsborg fuq fejn talbuni jekk ridtx ningħaqad magħhom għall- prova. Jien ma qgħadtx naħsibha darbtejn u fil-fatt mort fil-Boras Arena fejn b’xorti tajba qtajt figura tajba. L-isbaħ mument kien meta ddebuttajt mat-team tal-kbar proprju fil-UEFA Europa League kontra Napoli. Għalkemm tlifna 2-0, konna tajna wirja tajba ħafna u jien kont kuntent bil- wirja tiegħi.
Il-coach ta’ dak iż-żmien kellu fiduċja kbira fija tant li kien jinvolvini ta’ spiss fl-ewwel 11. Fl-2013 l-aġent tiegħi li kien qed jitħabat ħafna sabiex isibli team barra minn pajjiżi, irċieva offerta mingħand PSV Eindhoven.
Kienet xi ħaġa kbira għalija għax dan hu team kbir li żgur m’għandu bżonn tal-ebda introduzzjoni. Fil-fatt f’kemm ilni ngħidlek iffirmajt magħhom u bdejt nilgħab b’mod regolari.
Dawn il-wirjiet għenuni ħafna sabiex nibda karriera oħra fl-Italja din id-darba ma’ Palermo u Genoa. L-esperjenzi tiegħi komplew proprju fil-Greċja ma’ Panathinaikos u fir-Russja ma’ Dynamo Moscow sabiex ftit tax-xhur ilu mort ma’ Aalborg fid-Danimarka. Sfortunatament kelli ntemm il-karriera tiegħi ta’ 28 sena.
X’kienet ir-raġuni li rtirajt daqshekk kmieni?
Ovvjament kelli nirtira kontra qalbi meta tqis li ta’ 28 sena kont għadni fl-aqwa tal-karriera tiegħi.
Madankollu fl-aħħar ħames snin kien qed ikolli uġigħ regolari f’ġenbejja u rkuptejja. Minkejja li għamilt diversi operazzjonijiet, l-uġigħ baqa’ jitfaċċa u wara diskussjoni twila mat-tobba tiegħi, kien inevitabbli li ndendel iż-żarbun tal-football sabiex ma nkomplix niggravaha. Dan kollu seħħ ftit tax-xhur ilu u ħarġet qalbi meta fuq il-profil tiegħi fuq Instagram kelli nagħti din l-aħbar ħażina.
Kien għalhekk li mal-club tiegħi Aalborg li għadni taħt kuntratt magħhom għal sentejn oħra, tkellimt mad-diriġenti u ddeċidejt li nservi fir-rwol ta’ assistent coach, xi ħaġa li qed nidra nagħmel u li fiha qed nitgħallem il-kwalitajiet pożittivi tagħha.
Kif kienet l-esperjenza tiegħek fl-Italja?
Nemmen li l-esperjenza li kelli fl-Italja ma’ Palermo u Genoa kienu l-isbaħ mumenti fil-karriera tiegħi. Miegħi kelli wkoll kollega ieħor mill-Isvezja, Robin Quaison, u dan il-fatt għeni ħafna sabiex nambjenta ruħi fi Stadio Renzo Barbera.
Niftakar fil-goal li skorjajt fl-ewwel xahar tiegħi fi Sqallija kontra Carpi fejn kont għent lit-team niksbu draw ta’ 2-2.
Sitt ijiem wara saħansitra skorjajt doppjetta kontra AC Milan għalkemm xorta tlifna 3-2 f’darna. Verament m’għandix xi ngerger mill- ambjent li offrewli Palermi u għalhekk nqisha bħala esperjenza ferm pożittiva.
Ma’ Genoa bdejt fuq bażi ta’ self sabiex sena wara ddeċidew li jiksbu s-servizzi tiegħi. Il-coach ta’ dak iż-żmien tani ħafna fiduċja f’nofs il-ground u naħseb li qdejt dmiri bl-aqwa mod possibbli.
U kif tiddeskrivi l-esperjenzi fil-Greċja u r-Russja?
Fil-veritá, Genoa kienu bagħtuni fuq bażi ta’ self ma’ Panathinaikos u Dynamo Moscow. Ċertament li dawn kienu esperjenzi qosra ħafna, ftit nista’ nitkellem fuqhom ħlief li ngħid li esperjenzajt tipi u stili differenti ta’ football.
Forsi l-iktar mument ftit diżappuntanti seħħ proprju fil-Greċja fejn Panathinaikos kienu għaddejjin minn problemi finanzjarji u għalhekk tkellimt mal-club sabiex ma nibqax nagħmel parti mit-team anke għax ma kinux qed jonoraw sew id-dmirijiet finanzjarji tagħhom mal-players.
U kif qed tħossok ma’ Aalborg?
Aalborg huwa club li fehem sew is-sitwazzjoni fiżika tiegħi. Fl-ewwel staġun tiegħi lgħabt għaxar partiti magħhom u skorjajt goal wieħed biss. Meta ġejt biex nirtira huma fehmu li kont bejn ħaltejn x’għandi nagħmel u għalhekk offrewli l-kariga ta’ assistant coach.
X’memorji għandek tat-team nazzjonali Svediż?
It-team nazzjonali ta’ pajjiżi huwa ferm għal qalbi għax dejjem tajt il-mija fil-mija tiegħi. Lgħabt 28 darba u kelli ċ-ċans li nipparteċipa fil-Kampjonat Ewropew tas-sena 2016 u t-Tazza tad-Dinja ta’ sentejn wara.
Kif tiddeskrivi l-ambjent f’Malta waqt il-kamp ta’ taħriġ li kellkom f’Ta’ Qali?
Dan hu ambjent ideali ħafna għall-player tal-football li ġej min-naħa ta’ fuq tal-Ewropa.
Bħalissa fil-pajjiżi Skandinavi t-temp hu wieħed estrem, it-temperatura hi ferm għolja u għalhekk kollox jinsab wieqaf. Irrid infaħħar il-faċilitajiet li hawn f’Malta u anke l-ospitalitá li kienet waħda kordjali ħafna.
Nixtieqek tgħaddi messaġġ lil dawk it-tfal u żgħażagħ li qed jaqraw din l-intervista u jridu jaqbdu karriera sportiva.
Fi ftit kliem ngħidilhom biex jemmnu fihom infushom, jiffukaw f’dak li qed jagħmlu u jkollhom riżultati sbieħ!
