Intemmet b’suċċess it-tieni Edizzjoni tat-Tornew tal-Milied Marindex organizzat minn Paola Volleyball Club. Paola Executive Security rebħu it-tieni edizzjoni ta’ dan it-tornew li ntlagħab bejn it-13 u 17 ta’ Diċembru 2023 fil-Padiljun tal-Isport f’Kordin.
It-timijiet ta’ Paola Executive Security (Super League), Paola Yes2Health Fitness Club (L-Ewwel Diviżjoni), Birkirkara (Super League) u Mġarr (L-Ewwel Diviżjoni) ħadu sehem f’dan it-tornew. Ċertament dan it-tornew serva biex il-clubs jintroduċu players u skemi ġodda u jiġi promoss aktar il-volleyball f’pajjiżna.
L-ewwel logħba tat-tornew kienet konfront dirett bejn it-timijiet ta’ Raħal Ġdid, Paola Executive Security u Paola Yes2Health Fitness Club, fejn Paola Executive Security ħarġu rebbieħa bi skor ta’ 3-0.
Fit-tieni logħba, Birkirkara kellhom konfront iebes kontra Mġarr. Birkirkara spiċċaw rebbieħa ta’ din il-logħba bi skor ta’ 3-1. Fil-logħba sussegwenti, Birkirkara sfaw megħluba minn Paola Executive Security bi skor ta’ 3-1.
Fil-logħba bejn Mġarr u Paola Yes2Health Fitness Club, kienu Mġarr li ħarġu rebbieħa bi skor ta’ 3-0. Fl-ewwel konfront tal-aħħar ġurnata ta’dan it-tornew, Birkirkara għilbu lil Paola Yes2Health Fitness Club bi skor ta’ 3-1.
Fl-aħħar logħba, Mġarr lagħbu kontra Paola Executive Security, fejn it-tim Pawlist iddomina il-konfront u rebħu 3-0. B’hekk, Paola Executive Security spiċċaw f’ras il-klassifika biex rebħu dan it-tornew bi tliet rebħiet.
Fi stqarrija, il-President ta’ Paola Volleyball Club, Dr Kenneth Vella, irringrazzja lil Marindex Trophies u l-Malta Volleyball Association li bl-appoġġ tagħhom seta’ jittella’ dan it-tornew.
Ringrazzjament speċjali jmur ukoll lejn l-Assoċjazzjoni Sportiva Hibernians, Izibet, Dragonara Casino And Brasserie, Maypole, HandsOn Systems Limited u De Paola Pharmacy tal-appoġġ tagħhom lejn il-club matul is-sena.