Partitarji ta’ Manchester United ġew ikkundannati bir-reqqa talli t-Tlieta filgħaxija kantaw korijiet relatati mad-diżastru ta’ Hillsborough lill-partitarji ta’ Liverpool.
Ir-Reds umiljaw lil Man Utd meta għelbuhom bl-iskor ta’ 4-0 u minn dik il-partita ċċirkolaw filmati xejn sbieħ ta’ partitarji tar-Red Devils ikantaw dawn il-korijiet.
Fil-filmat li nfirex ħafna fuq il-media soċjali, il-partitarji tal-United jistgħu jinstemgħu jkantaw: ‘(Il-ġurnal) The Sun kellha raġun, intom qattelin’.
Anfield qabel kien ingħaqad flimkien fis-seba’ minuta biex ikanta interpretazzjoni speċjali ta’ You’ll Never Walk Alone bħala ġest ta’ appoġġ lil Cristiano Ronaldo, li tilef il-partita wara l-mewt traġika ta’ ibnu li kien għadu kif twieled.
Minkejja dan il-ġest mill-partitarji ta’ Liverpool biex jonoraw lill-attakkant avversarju, sezzjoni ta’ partitarji tal-United għażlu li jinbxu lir-rivali tagħhom għall-mewt ta’ 97 partitarju f’Hillsborough.
Hillsborough jibqa’ l-akbar diżastru sportiv fl-istorja Brittanika fejn għaddew 33 sena minn dan id-diżastru li kien seħħ qabel is-semi-finali tal-FA Cup tal-1989.
B’kollox inqatlu 95 partitarju dakinhar jew wara l-inċident, b’Tony Bland imbagħad miet fl-1993 u Andrew Devine jitlef ħajtu s-sena l-oħra.
Dawn iż-żewġt irġiel eventwalment tilfu ħajjithom b’riżultat ta’ ġrieħi li ġarrbu f’Hillsborough.
Il-gazzetta The Sun tat tort lill-partitarji ta’ Liverpool talli kkawżaw l-inċident u ħarġet apoloġija biss 15-il sena wara.
Wara għexieren ta’ snin ta’ kampanja, fl-2016 inkjesta ddeċidiet li l-vittmi kienu ‘inqatlu illegalment’, bil-ġurati jikkonkludu li deċiżjonijiet tal-pulizija ‘ikkawżati jew ikkontribwew’ għall-imwiet, u ammontaw għal ‘negliġenza kbira’.
Ħafna utenti tal-midja soċjali esprimew id-disgust tagħhom għall-imġieba tal-partitarji tal-United nhar it-Tlieta bil-lejl.
