Paul Pogba ta x’jifhem li jista’ jirritorna ma’ Juventus fis-sajf li ġej, hekk kif l-ispekulazzjoni dwar il-futur tal-midfielder tkompli tiżdied.
Il-ftehim attwali tal-player ta’ 28 sena ma’ Manchester United għandu jiskadi f’Ġunju li ġej, li jfisser li, kif inhu hekk, huwa jkun liberu li jibda diskussjonijiet ma’ clubs barranin f’Jannar.
Rapport riċenti ddikjara li l-player internazzjonali ta’ Franza kien qed jipprepara biex jirrifjuta l-interess minn clubs oħra biex jiffirma ftehim ġdid ta’ £400,000 fil-ġimgħa mar-Red Devils.
Madankollu, Pogba ssuġġerixxa li jista’ jirritorna mal-Bianconeri fl-aħħar tal-istaġun, bir-rebbieħ tat-Tazza tad-Dinja tal-2018 jiżvela li għadu f’kuntatt ma’ sħabu tat-team f’Turin.
“Jien dejjem nitkellem ma’ sħabi tat-team ta’ Juventus, Juan Cuadrado, Paulo Dybala u oħrajn. Issa jien player ta’ Manchester United, għad għandi sena fil-kuntratt tiegħi, allura għad irridu naraw. Irrid nispiċċa l-istaġun ma’ Manchester United fuq nota pożittiva,” qal Pogba.
Pogba, li bħalissa jinsab fuq impenji internazzjonali ma’ Franza, qabel kien ħalla lil Man United bi free transfer biex jingħaqad ma’ Juventus fl-2012, u l-midfielder rebaħ erba’ titli tas-Serie A u żewġ trofej tal-Coppa Italia fil-club Taljan.
