L-attakkant ta’ Arsenal Pierre-Emerick Aubameyang iddeċieda li jingħaqad mat-team nazzjonali tal-Gabon għat-Tazza tal-Afrika tan-Nazzjonijiet kmieni u se jitlef il-partita kontra Manchester City nhar is-Sibt.
L-ex player ta’ Borussia Dortmund ma deherx mal-club minn meta tneħħa minn captain għal diversi miżuri ta’ dixxiplina aktar kmieni f’Diċembru.
Il-clubs tal-Premier League se jkunu jistgħu jżommu l-istilel tagħhom li se jieħdu sehem fl-AFCON sat-3 ta’ Jannar, bil-kontinġent ta’ Arsenal għalhekk se jkun disponibbli għall-konfront ma’ Man City fl-Ewwel tas-Sena.
Madankollu, Aubameyang diġà rrapporta għad-dmirijiet internazzjonali u għalhekk mhux se jkun għad-dispożizzjoni ta’ Mikel Arteta għaż-żjara taċ-champions Ingliżi.
Aubameyang xorta waħda kien ‘improbabbli’ li jissejjaħ għall-partita mat-team ta’ Pep Guardiola, u hu maħsub li qed jivvaluta l-għażliet tiegħu qabel it-tieqa tat-trasferimenti ta’ Jannar.
Barcelona, Juventus u Newcastle United kollha ġew akkreditati b’interess f’Aubameyang, li skorja seba’ goals minn 15-il logħba fit-tournaments kollha f’dan l-istaġun.
