Tmiem l-istaġun huwa żmien fejn bosta players jiddeċiedu dwar il-futur tagħhom.
Dan jista’ jfisser it-tislima tagħhom lejn il-club kurrenti u l-partitarji tagħhom, u proprju din il-ġimgħa bosta kienu dawk l-episodji emozzjonanti għal xi wħud.
Proprju nhar it-Tnejn li għadda, il-partitarji ta’ Juventus sellmu lil Giorgio Chiellini u Paulo Dybala, hekk kif lagħbu l-aħħar partita tagħhom f’darhom fi draw ta’ 2-2 kontra Lazio.
“Dik il-lejla indimentikabbli kienet waħda mill-isbaħ, mimlija emozzjonijiet,” qal il-coach ta’ Juventus, Massimiliano Allegri, “Kienet is-serata ta’ Chiellini u Dybala.”
Luis Suarez, Erling Haaland u Mark Noble kollha ngħataw tislima xierqa mill- partitarji tagħhom ukoll.
Din hija ħarsa ta’ dawn il-players li taw l-addio lill-clubs tagħhom.
Giorgio Chiellini
Id-difensur Taljan kien ilu parti mill-iskwadra ta’ Juventus minn meta ngħaqad magħhom mingħand Fiorentina fl-2005.
Fi 17-il sena mal-Bianconeri, huwa rebaħ disa’ titli tas-Serie A u ħames darbiet il-Coppa Italia.
Id-difensur ċentrali ta’ 37 sena, li se jirtira mill-football internazzjonali x-xahar id-dieħel, qed jissemma’ li jista’ jmur jilgħab fil-Major League Soccer.
Qabel il-konfront kontra Lazio, il-partitarji Bianconeri kantaw li “hemm captain wieħed biss” filwaqt li kkreaw koreografija kbira li uriet il-flokk bin-numru 3 tiegħu.
Chiellini ġie sostitwit fis-17-il minuta liema bidla kienet tirrifletti n-numru ta’ snin tas-servizz li ta lil dan il-club glorjuż … fejn ingħata wkoll tislima minn dawk kollha preżenti inklużi l- players u l-partitarji avversarji.
Leonardo Bonucci, li kien jifforma koppja ma’ Chiellini mill-2010, bl-eċċezzjoni tal-istaġun 2017-18 meta ngħaqad ma’ Milan, tah ġieħ emozzjonali fuq il-media soċjali: “Int kont eżempju, gwida u ħabib kbir.
“Dak il-ħajt inviżibbli li akkumpanjana fil-ground se jorbotna għal dejjem … konna koppja formidabbli … fir-rebħiet u fl-aktar mumenti diffiċli. Grazzi captain. Inħobbok … u ma ninsik qatt.”
Paulo Dybala
L-attakkant Arġentin ta’ 28 sena ngħata l-faxxa tal- captain mingħand Chiellini hekk kif id-difensur ħareġ mill-ground.
Wara l-partita, sħabu refgħuh u għollewh fl-ajru fejn ma setax iżomm id-dmugħ.
Paulo Dybala, li qatta’ seba’ snin ma’ Juventus, rebaħ ħames titli tas-Serie A u erba’ darbiet il-Coppa Italia.
Fi tmiem l-istaġun huwa se jkun player ħieles hekk kif jintemmlu l-kuntratt.
Fuq Instagram, Dybala, li skorja 115-il goal għall-Bianconeri fil-kompetizzjonijiet kollha, kiteb:
“Huwa diffiċli li nsib il-kliem biex nagħti l-addio minħabba ż-żmien kollu li lgħabt ma’ Juventus … b’ħafna emozzjonijiet.
“Ħsibt li se nibqa’ nilgħab ma’ dan it-team għal aktar snin … iżda d-destin poġġiena f’toroq differenti.
“Kienu seba’ snin maġiċi, bir-rebħ ta’ 12-il trofej u 115-il goal li ħadd m’hu se jneħħili. Qatt!”
“Li nilbes dan il-flokk importanti kif ukoll bil-faxxa ta’ captain kien wieħed mill-aktar mumenti li kont kburi, u nittama li xi darba nuri dan lil uliedi u lil ulied uliedi.”
Luis Suarez
Bil-kuntratt tiegħu se jiskadi dan is-sajf, l-attakkant ta’ 35 sena lagħab l-aħħar logħba home ma’ Atletico Madrid fid-draw ta’ 1-1 kontra Sevilla.
Luis Suarez beda l-partita u tkeċċa fl-64 minuta.
L-Urugwajan lagħab biss sentejn ma’ Atletico, iżda kien protagonista fir-rebħ tat-titlu ta’ La Liga għall-ewwel darba f’seba’ snin fejn skorja 21 goal fi 38 partita.
Il-partitarji fil-Wanda Met -ropolitano Stadium firxu banner kbira bil-kliem: “Grazzi ‘Lucho’ talli għamiltna champions.”
Suarez kien viżibbilment emozzjonat hekk kif niżżel lill-familja tiegħu fil-pitch wara l-partita.
U mbagħad fuq Instagram kiteb: “Eternalment grat lejn il-partitarji għall- imħabba u r-rispett li dejjem urewni.”
F’dak li għandu x’jaqsam għall-istaġun li ġej, qed jingħad li se jkun hemm riunjoni mal-ex sieħbu fit-team ta’ Liverpool, Steven Gerrard, li llum jinsab fit-tmexxija tat-team ta’ Aston Villa.
Mark NOBLE
Mark Noble se jirtira wara karriera ta’ 18-il sena ma’ West Ham, fejn għamel kważi 550 dehra mal-club minn Londra.
Imwieled f’Canning Town u trabba mil ‘il bogħod mill-istadium ta’ Upton Park, Noble kien partitarju kbir sa minn etá żgħira, sar player u qatta’ l-karriera tiegħu mal-Hammers.
L-aħħar logħba tiegħu home tibqa’ indimentikabbli hekk kif il-Hammers kisbu punt kontra l-leaders Manchester City fid-draw ta’ 2-2.
Qabel il-partita tpoġġa flokk bin-numru 16 fil-pitch u proprju fis-16-il minuta ngħata ovazzjoni tremenda minn dawk kollha preżenti.
Noble daħal bħala sostitut tard fil-logħba u wara dan ir-riżultat ta’ draw, huwa ndirizza lil dawk kollha preżenti.
“Bla dubju, din hija ġurnata mill-aktar emozzjonali għalija u għall-familja tiegħi. Illum għandi ħafna membri tal-familja preżenti – u meta ngħid ħafna membri tal-familja qed infisser 60,000 persuna,” qal lill-partitarji.
“Nittama li fl-aħħar 18-il sena għamiltkom kburin.”
Erling Haaland
Erling Haaland sellem lil Borussia Dortmund billi għamel dak li l-aħjar jagħmel – jiskorja l-goals.
Fl-aħħar logħba quddiem il-partitarji tiegħu, il-player ta’ 21 sena skorja penalty fit-68 minuta hekk kif Dortmund għelbu lil Hertha Berlin bl-iskor ta’ 2-1 fis-Signal Iduna Park.
Barra minn hekk saret ċerimonja biex timmarka t- tluq tal-attakkant Norveġiż qabel il-kick-off, bil-partitarji ta’ Dortmund ikantaw ismu kontinwament.
Wara l-partita, sħabu tawh ‘gwardja tal-unur’.
Minn meta ngħaqad ma’ Dortmund, f’Jannar 2020, Haaland skorja 86 goal f’89 logħba.
“Ma kien xejn ħlief unur li tilbes dan il-flokk,” Haaland kiteb fuq Twitter.
“F’Dortmund qattajt mumenti memorabbli, iltqajt ma’ nies speċjali, biex ma nsemmux lill-partitarji li kienu dejjem wara t-team u l-players.”
Wara l-partita, Haaland mar isellem lill-partitarji biex jirringrazzjahom tal- appoġġ li dejjem tawh.
Huwa se jimxi fuq il-passi ta’ missieru, Alf-Inge, meta f’Lulju li ġej, se jingħaqad ma’ Man City wara li ġiet attivata klawsola ta’ €60 miljun fil-kuntratt tiegħu.
