Bejn illum u għada tintlagħab it-13-il ġurnata tal-Kampjonat Premier fejn l-aktar partita mistennija, dik bejn Hamrun Spartans u Birkirkara, ġie posposta minħabba każijiet tal-Covid-19.
Dan ifisser li Hibernians jistgħu jkomplu jkabbru l-vantaġġ f’ras il-klassifika meta jiltaqħu kontra Gudja United.
Partita oħra interessanti hija dik bejn ir-rivali antiki Floriana u Sliema Wanderers peró llum tilfet għal kollox mill-interess tagħha.
Gzira U. v Sta Lucia – Dan huwa konfront bejn żewġ timijiet li fl-aħħar ħarġa tagħhom sfaw megħluba bl-iskor identiku ta’ 3-1 – Gzira United kontra Hibernians u Sta Lucia kontra Floriana.
Il-Gżirjani dehru li forsi kienu se jiksbu rebħa kontra l-Pawlisti meta fetħu l-iskor minn Maxuell Maia.Iżda bi tliet goals fit-tieni taqsima, Hibernians dawru r-riżultat favur tagħhom.
Min-naħa l-oħra, Sta Lucia kellhom ibaxxu rashom quddiem Floriana b’dawn tal-aħħar ikunu dominanti għal kollox għajr f’xi waqtiet li fihom l-Luċjani rnexxielhom inaqqsu l-marġni.
Huma jridu jgħaddu mingħajr is-sospiż Alan da Silva Souza filwaqt li Gzira għandhom lil Steve Borg nieqes meta għadu qed jirkupra minn injury.
Mosta v Sirens – Din hija logħba bejn żewġ ġirien li qed jissieltu kontra r-relegazzjoni, minkejja li Sirens jinsabu ħames punti fuq iż-żona l-ħamra.
Fl-aħħar ħarġa tagħhom temmew fi draw ta’ bla goals kontra Gudja United waqt li rebħu partita waħda mill-aħħar ħames ħarġiet.
Huma batew biex joħolqu ċ-ċansijiet u qatt ma approfittaw mis-superjorità numerika meta Gudja niżlu għal disa’ players wara t-tkeċċija ta’ Farid Zuniga fit-53 minuta … wara li ż-żewġ timijiet kellhom player imkeċċi kull wieħed fit-18-il minuta.
Min-naħa tagħhom Mosta jimmiraw li jirreġistraw l-ewwel rebħa f’ħames ħarġiet … wara li kisbu biss żewġ punti minn massimu ta’ 12 … hekk kif jinsabu fuq iż-żona tar-relegazzjoni.
Rebħa ttellagħhom punt taħt Sirens u jitbegħdu xi ftit miż-żona tar-relegazzjoni.
Fl-ewwel round iż-żewġ timijiet spiċċaw 1-1. Filwaqt li Mosta m’għandhomx problemi ta’ players neqsin, Sirens se jkunu mingħajr is-sospiżi, Brandan Fernando u Carlo Zammit Lonardelli.
Gudja U. v Hibernians – Hibernians jaffrontaw lil Gudja United u fuq il-karta jibdew favoriti biex jiksbu d-double wara li fl-ewwel round ħarġu rebbieħa bl-iskor ta’ 2-1.
Hibs irritornaw għar-rebħ wara li ġew miżmuma fi draw ta’ mingħajr goals minn Floriana iżda fi tmiem il-ġimgħa li għadda kabbru l-vantaġġ tagħhom fil-quċċata b’rebħa ta’ 3-1 fuq Gzira United.
B’wirja mpressjonanti dawru telfa f’rebħa li kienet orkestrata minn Jake Grech li rnexxielu wkoll iniżżel ismu fuq il-lista ta’ l-iskorers wara li Jurgen Degabriele skorja doppjetta.
Gudja United jinsabu fil-periklu tar-relegazzjoni u jimmiraw li joħolqu xi sorpriża. Iżda huma se jkollhom liż-żewġ players, Tensior Gusman u Farid Zuniga, sospiżi wara li tkeċċew kontra Sirens.
Floriana v Sliema W. – Floriana jiltaqgħu kontra Sliema Wanderers liema partita hija meqjus diffiċli għall-Blues.
Dan huwa perjodu nkwetanti għall-Wanderers meta jinsabu fl-aħħar pożizzjoni u għadhom qed ifittxu l-ewwel rebħa.
Iżda flimkien ma’ Balzan huma jridu jirkupraw partita meta dik ta’ bejniethom ta’ tmiem il-ġimgħa li għadda ġiet posposta minħabba każijiet tal-Covid-19.
Floriana jimmiraw li jieħdu t-tliet punti biex jibqgħu fit-taqtiegħa għal post mal-ewwel erbgħa.
Fl-ewwel round iż-żewġ timijiet spiċċaw fi draw ta’ mingħajr goals minkejja li l-Greens iddominaw il-partita iżda sabu lill-goalkeper, Timothy Aquilina, f’burdata mill-aqwa meta salva dak kollu mitfugħ lejh u ċaħħad lil Floriana minn rebħa meritata.
Floriana se jkunu mingħajr Christian Rutjens u Jose Arias għax sospiżi filwaqt li Oualid El Hasni jista’ jirritorna minn injury.
Min-naħa l-oħra, Julius Bliek se jkun l-uniku player sospiż għall-Wanderers.
Balzan v Valletta – Balzan jaffrontaw lil Valletta f’logħba li faċilment tista’ tmur kull naħa.
Bħalissa Balzan jinsabu fis-sitt post b’logħba inqas fejn jimmiraw għal rebħa biex jitilgħu aktar postijiet ‘il fuq fil-klassifika wara li fl-aħħar partita ġew miżmuma fi draw ta’ 3-3 minn Sta Lucia … fejn il-vantaġġ tagħhom ġie annullat darbtejn mill-Brażiljani Francisco Farias u Alan da Silva Souza.
Anke Valletta jridu jirritornaw għar-rebħ wara t-telfa kontra Hamrun Spartans li waslet minn auto-goal sfortunat ta’ Haris Dilaver.
Il-moral tal-Beltin bħalissa huwa kemmxejn baxx meta kisbu biss erba’ punti minn tliet ħarġiet u għaldaqstant ma jistgħux jitilfu l-kuntatt minn mal-leaders Hibernians.
Iż-żewġ timijiet għandhom il-players kollha disponibbli.
