Wara żewġ telfiet konsekuttivi domestiċi u rebħa fiċ-Champions League, iċ-champions Manchester City se jkollhom impenn diffiċli meta għada jagħlqu t-tmien programm tal-Premier League Ingliż meta jiltaqgħu kontra Arsenal fl-Emirates Stadium.
Bħalissa s-City qed igawdu punt vantaġġ fuq il-Gunners wara li s-Sibt li għadda sfaw megħluba 2-1 minn Wolves biex b’hekk tawhom l-ewwel telfa fil-kampjonat wara sitt rebħiet konsekuttivi.
Iżda t-team ta’ Pep Guardiola rritorna għar-rebħ meta nhar l-Erbgħa għeleb lil RB Leipzig 3-1 fiċ-Champions League. Min-naħa ta’ Arsenal huma ġejjin minn telfa 2-1 kontra Lens fiċ- Champions League wkoll. Is-City se jkollhom lill-midfielder Rodri sospiż.
Il-programm jibda bil- logħba ta’ ħin l-ikel bejn Luton Town u Tottenham li qed jokkupaw pożizzjonijiet kuntrastużi: Spurs fit-tieni post u Luton ir-raba’ mill-aħħar fejn bla dubju it-team ta’ Ange Postacoglu ma jidhirx li għandu jfalli xi punti.
Spurs ġejjin mir-rebħa kontroversjali bl-iskor ta’ 2-1 kontra Liverpool li fiha r-Reds kellhom goal validu annullat waqt li Diogo Jota u Curtis Jones ġew imkeċċija b’mod kontroversjali wkoll.
Nhar it-Tlieta Luton lagħbu l-logħba li kellhom nieqsa kontra Burnley f’Kenilworth Road li fiha sfaw megħluba 2-1.
Burnley se jilqgħu lil Chelsea li grazzi għar-rebħa 2-0 kontra Fulham it-Tnejn li għadda issa telgħu fil-11-il post u kif ngħiduha bil-Malti: inġabru xi ftit.
Għall-Clarets se jirritorna Lyle Foster minn sospensjoni u għall-Blues Nicolas Jackson se jagħmel l-istess għalkemm Malu Gusta jinsab sospiż għat-team immexxi minn Mauricio Pochettino.
Manchester United se jkunu f’Old Trafford biex jilqgħu lil Brentford meta tal-ewwel jinsabu żewġ punti iktar mill-Bees fl-10 post b’dawn qed jokkupaw l-14-il post.
Il-United xejn ma kellhom bidu feliċi dan l- istaġun meta tilfu erba’ logħbiet bis-sebgħa li lagħbu bl-aħħar waħda tkun dik 1-0 kontra Crystal Palace li ftit jiem qabel kienu għelbuhom 3-0 fil-League Cup.
Barra minn hekk il-United ġejjin mit-telfa 3-2 f’darhom kontra t-Torok, Galatasaray fiċ-Champions League, b’dawn anke fallew penalty minn Mauro Icardi li mill-11-il metru tefa’ barra.
Everton, li jinsabu l- ħames mill-aħħar, se jilagħbu kontra Bournemouth li jinsabu qabel tal-aħħar punt inqas minnhom. Everton kisbu rebħa u draw waqt li ċ-Cherries ħadu tliet punti minn daqstant draws.
Il-logħba tal-lum filgħaxija se tkun dik li se tintlagħab f’Selhurst Park bejn Crystal Palace u Nottm Forest biż-żewġ timijiet jieħdu rebħa biss minn aħħar ħames ħarġiet.
It-team ta’ Roy Hodgson jinsab fid-disa’ post bi 11-il punt, tnejn iktar mill-Forest li llum se jkollhom nieqes Moussa Niakhate għax jinsab sospiż.
Il-logħba l-oħra tal-lum hija dik bejn Fulham u Sheffield United bil-Cottagers għandhom ċans li jitilgħu xi postijiet u jħallu lil Blades fl-aħħar post tal-klassifika meta għandhom punt wieħed biss x’juru.
Għada wara nofs in-nhar se jintlagħbu tliet logħbiet qabel ma ssir il-logħba l-kbira bejn Arsenal u Manchester City.
Liverpool se jippruvaw jinsew il-kontroversja tat- telfa kontra Tottenham meta jmorru għand Brighton li għandhom il-ħila li jagħtu logħba diffiċli lil kull avversarju.
Is-Sibt li għadda s-Seasiders kienu fin-naħa l-ħażina ta’ skor tennistiku, 6-1, meta kienu f’darhom kontra Aston Villa. Imbagħad nhar il-Ħamis kisbu draw kreditabbli ta’ 2-2 kontra Marseille fi Franza wara li kienu sabu ruħhom żewġ goal minn taħt.
Il-logħba għandha tkun waħda missielta meta Liverpool jinsabu fis-sitt post, żewġ punti taħt il-leaders waqt li Brighton jinsabu s-sitta punt warajhom.
Logħba bejn żewġ timijiet ġejjin minn rebħiet fl-Ewropa hija dik bejn West Ham u Newcastle b’dawn jiksbu rebħa impressjonanti ta’ 4-1 fuq Paris St-Germain.
Intant huma l-Hammers li jinsabu fis-seba’ post punt iktar mill-Magpies li rebħu l-aħħar tliet logħbiet fil- kampjonat.
Finalment Wolves se jkunu f’Molineux biex jilqgħu lil Aston Villa fid-derby tal-Midlands biż-żewġ timijiet ġejjin minn rebħiet impressjonanti kontra Manchester City u Brighton rispettivament waqt li l-Villa rebħu fl-Ewropa wkoll meta għelbu lil Zrinjski Mostar b’goal uniku fl-94 minuta minn John McGinn.
Wolves għandhom lill- attakkant Jean-Ricner Bellegarde sospiż.
