Meta fi tmiem din il-ġimgħa se tintlagħab it-tielet ġurnata tal-Premier League Ingliż l-attenzjoni se tkun mixħuta fuq il-logħba ta’ għada bejn Manchester United u Liverpool li se ssir f’Old Trafford.
Liverpool huma wieħed minn erba’ timijiet li għandhom punti massimi bl-oħrajn ikunu Manchester City, Brighton u Arsenal waqt li l-United, Aston Villa, Newcastle u Brentford ma żammewx il-pass magħhom.
Wara r-rebħa kontra Fulham fl-ewwel ħarġa l-United żelqu kontra Brighton waqt li r-Reds kisbu t-tieni rebħa bl-istess riżultat ta’ 2-0. Wara li lbieraħ għalaq is-suq tat-trasferimenti issa rridu naraw kif se jkunu ffurmati t-timijiet b’Liverpool jissaħħu bit-Taljan, Federico Chiesa, waqt li l-United xtraw iktar players bħal Joshua Zirkzee, Leny Yoro, Matthijs de Ligt, Noussair Mazraoui u Manuel Ugarte, għalkemm irridu naraw kemm minnhom se juża l-manager, Erik ten Hag, għada.
Arsenal se jkunu f’darhom kontra Brighton li bdew l-istaġun tajjeb taħt il-manager żagħżugħ Ġermaniż, Fabian Hurzeler. Huma bdew b’żewġ rebħiet li jarawhom jitħalltu mat-timijiet elite u b’hekk juru li bil-għaqal li huwa mmexxi l-club kapaċi jagħtu battikati lil kwalunkwe team.
Min-naħa tagħhom il- Gunners għamluhom żewġ rebħiet ta’ 2-0 meta għelbu lil Aston Villa barra minn darhom meta dawn tal-aħħar issa donnhom daħlu fl-għalqa tat-Top Six.
Il-Villa se jmorru fil-King Power Stadium biex jiltaqgħu kontra l-promossi Leicester City b’dawn għadhom ħadu punt biss u għalhekk iridu joqogħdu attenti li ma jinqabdux fiż-żona l-ħamra daqstant kmieni fl-istaġun.
Iċ-champions Manchester City se jżuru l-London Stadium biex jiltaqgħu kontra West Ham United meta s’issa wrew il-konsistenza rinomata magħhom bl-attakkant Erling Haaland ikun l-ispirazzjoni hekk kif għadu jaf sew fejn hija x-xibka.
Infatti minkejja li kontra Ipswich sofrew goal bikri huma ma sabuhiex diffiċli biex idawru telfa f’rebħa. Huma reġgħu ssaħħew billi ħadu lura lill-midfielder Ġermaniż, Ilkay Gundogun, li ħalla lil Barcelona wara staġun.
Żewġ timijiet b’erba’ punti kull wieħed, Newcastle u Tottenham, li jinsabu fil-ħames u fis-sitt postijiet, se jħabbtuha kontra xulxin f’St James Park waqt li Chelsea, li ġejjin mix-‘xalata’ ta’ 6-2 kontra Wolves, se jkunu nvoluti fid-derby ta’ Londra kontra Crystal Palace li għad iridu jingranaw meta s’issa ma kisbu l-ebda punt.
Timijiet oħra fl-istess sitwazzjpni tal-Palace huma Southampton, Ipswich, Wolves u Everton
