Erling Haaland kiser ir-rekord tal-goals tal-Premier League fi staġun hekk kif Manchester City irritornaw fil-quċċata tal-klassifika meta għelbu lil West Ham 3-0 fl-Etihad Stadium.
Il-lob sublimi ta’ Haaland fuq Lukasz Fabianski 20 minuta mit-tmiem wasslu għal 35, wieħed iktar minn Andy Cole u Alan Shearer, li t-total ta’ 34 goal tagħhom kien wasal fi staġuni ta’ 42 logħba.
In-Norveġiż li huwa mwieled f’Leeds, issa jinsab fuq 51 fil-kompetizzjonijiet kollha, 12 inqas mir-rekord Ingliż ta’ kull żmien ta’ Dixie Dean ta’ Everton, b’disa’ logħbiet potenzjali x’jintlagħbu.
L-aħħar goal ta’ Haaland għen lis-City jiksbu d-disa’ rebħa konsekuttiva fil-kampjonat – u issa qed jillidjaw lil Arsenal b’punt b’logħba inqas minnhom.
Nathan Ake poġġihom fil-vantaġġ b’daqqa ta’ ras minn free-kick ta’ Riyad Mahrez mat-tieni lasta fil-50 minuti, waqt li volley imxellef ta’ Phil Foden fil-85 minuta ssiġilla r-rebħa.
Il-goal ta’ Foden kien l-1,000 wieħed tas-City minn mindu Pep Guardiola ngħaqad mal-club fl-2016.
SALAH IKOMPLI JISKORJA WKOLL – Liverpool żammew ħajjin it-tamiet remoti tagħhom li jikkwalifikaw għaċ-Champions League tal-istaġun li ġej wara li Mohamed Salah kompla l-forma notevoli tiegħu li jiskorja f’Anfield biex għen ħalli jegħlbu lil Fulham 1-0.
Salah skorja għat-tmien logħba konsekuttiva f’darhom hekk kif ir-Reds rebħu għall-ħames logħba konsekuttiva tal-Premier League biex żammew il-forma li tiffjorixxi sa tard fl-istaġun.
L-attakkant tal-Eġittu għeleb lil Bernd Leno minn penalty fid-39 minuta wara li Darwin Nunez kien iffawljat minn Issa Diop.
Madankollu, kien jeħtieġ save eċċellenti b’id waħda mill-goalkeeper Alisson fis-77 minuta, biex iżomm tentattiv tal-kompatrijott tiegħu, Carlos Vinicius.
It-team ta’ Jurgen Klopp baqa’ fil-ħames post tal-klassifika, erba’ punti wara Manchester United li jinsabu qabilhom, b’żewġ logħbiet inqas minnhom inkluża l-partita tal-bieraħ għand Brighton.
