Minn Cristian Muscat
Bejn illum u nhar il-Ħadd li ġej tintlagħab is-sitt ġurnata tal-Closing Round jew aħjar it-22 ġurnata tal-Malta Premier League b’għadd ta’ partiti mill-aktar interessanti hekk kif il-kwadru qed jifforma bejn it-timijiet ta’ fuq u dawk fin-naħa t’isfel tal-klassifika.
Madankollu kollox għadu miftuħ għajr l-aħħar post tal-klassifika hekk kif jidher li d-destin ta’ Naxxar Lions huwa diġá miktub.
It-timijiet li qed jokkupaw l-ewwel żewġ postijiet, Hamrun Spartans u Floriana, fuq il-karta jibdew favoriti li jiksbu t-tliet punti meta jilagħbu kontra Melita u Balzan rispettivament.
Sliema Wanderers, li jinsabu fit-tielet post, għandhom partita delikata kontra Gzira United filwaqt li Birkirkara m’għandhomx ifallu kontra Naxxar Lions.
Hibernians jaffrontaw lit-team rivelazzjoni ta’ din it-tieni fażi, Zabbar St Patrick, u għaldaqstant jistennew sfida diffiċli.
Il-partita li tiftaħ dan il-programm tkun dik bejn Mosta u Marsaxlokk li hija miftuħa għal kull riżultat.
Hamrun S. v Melita – Il-leaders Hamrun Spartans jimmiraw li jkomplu għaddejjin bis-sensiela pożittiva meta jiltaqgħu kontra Melita.
L-Ispartans ġejjin minn erba’ rebħiet u żewġ draws hekk kif issa ilhom ma jitilfu mis-17 ta’ Diċembru, li għadda … bl-iskor ta’ 2-1 kontra Mosta.
Fl-aħħar ħarġa tagħhom huma kellhom jitħabtu biex għelbu lil Zabbar St Patrick bl-iskor minimu ta’ 1-0 … u għaldaqstant iridu juru rispett massimu lejn l-avversarji tagħhom minkejja li sfaw megħluba minn Sliema Wanderers bl-iskor ta’ 4-2.
Din għalihom kienet l-ewwel telfa minn erba’ partiti biex saħansitra jinsabu f’pożizzjoni bil- possibbiltá li jevitaw ir-relegazzjoni.
Huma ma jistgħux jinkludu lil Henrique Marcelino Motta għax sospiż peró jilqgħu bil-ferħa r-ritorn taż-żewġ players Kurt Bondin u Gareth Barone minn sospensjoni.
Fil-partita preċedenti, l- Ispartans kienu ħarġu rebbieħa bl-iskor ta’ 2-1.
Balzan v Floriana – Floriana, li qed jimmiraw li jirbħu din it-tieni fażi biex jiġu dikjarati champions b’mod awtomatiku wara li rebħu l-ewwel waħda, jiltaqgħu kontra Balzan li ġejjin minn rebħa ta’ 3-0 fuq Naxxar Lions.
Għaldaqstant, immexxija mill-coach il-ġdid Andrew Cohen, jinżlu għal dan il-konfront b’moral għoli.
Wara t-telfa xejn mistennija kontra Melita bl-iskor ta’ 2-0, il-Furjaniżi jridu juru rispett lejn l-avversarji biex ma jiġix ripetut dan id-diżappunt.
Fl-aħħar ħarġa, il-Greens irnexxielhom jissuperaw lil Marsaxlokk bl-iskor ta’ 2-1 f’partita mill-aktar diffiċli bil-goal tar-rebħa jasal lejn it-tmiem biex ix-Xlukkajri ma setgħux jirkupraw minnu.
Għall-Balzanin, Henri Braham Stanic ikun sospiż għat-tielet partita konsekuttiva filwaqt li Floriana mistennija jinżlu bl-aqwa formazzjoni possibbli.
Fil-logħba diretti tal-Ewwel Fażi, Floriana kienu ħarġu rebbieħa bl-iskor ta’ 3-0.
Sliema W. v Gzira U. – Din hija partita bejn żewġ ġirien li fil-passat Gzira United kienu wkoll jissupplixxu players lil Sliema Wanderers li llum jitqiesu bħala leġġendarji … bl-aktar wieħed li jispikka huwa Ronnie Cocks.
Fil-veritá, il-Maroons ma jistgħux ifallu minħabba li jistgħu jinqabdu fil-Bottom Six u għaldaqstant iridu jkunu fl-aqwa forma possibbli … kontra team li qed jissielet biex itemm fl-ewwel żewġ postijiet bil- possibbiltá li jikkwalifika għas-semi-finali għar-rebħ tat-titlu.
Iż-żewġ timijiet għandhom player sospiż – Jean Borg għas-Slimiżi u Luis Carlos Riascos għall-Gżirjani. Iżda l-Blues ikollhom lura lil Geoffrey Acheampong minn sospensjoni.
Fl-Ewwel Fażi iż-żewġ timijiet kienu temmew fi draw ta’ 2-2.
Naxxar L. v Birkirkara – Birkirkara jiltaqgħu kontra Naxxar Lions u jibdew favoriti għall-fatt li dawn tal-aħħar s’issa ma kisbu l-ebda punt u ma skorjaw l-ebda goal f’din it-Tieni Fażi.
Min-naħa l-oħra, l-Istripes għadhom ma sofrewx telfa f’din il-fażi.
Iż-żewġ timijiet mistennija jinżlu bl-aqwa forma possibbli.
Fil-logħba diretta, Birkirkara kienu għelbu lin- Naxxarin bl-iskor ta’ 1-0
Hibernians v Zabbar SP– Hibernians għandhom ostaklu mill-aktar diffiċli hekk kif jaffrontaw lil Zabbar St Patrick u jekk dawn tal-aħħar jirnexxielhom joħorġu rebbieħa, jilħqu lill-istess Hibernians fil- klassifika.
Il-Pawlisti għandhom lil Khevin Rodrigo Fraga sospiż filwaqt li Dorde Jovicic jirritorna minn sospensjoni għaż-Żabbarin.
Fil-partita preċedenti Hibernians ħarġu rebbieħa bl-iskor ta’ 2-1.
Mosta v Marsaxlokk – Dan huwa konfront bejn żewġ timijiet li tilfu fl-aħħar ħarġa tagħhom u għaldaqstant ma jistgħux jaffordjaw telfa oħra.
Joao Victor De Souza Teixeira huwa sospiż għal Mosta filwaqt li Marsaxlokk mistennija jinżlu bl- aqwa formazzjoni.
Fl-Ewwel Fażi, Mosta kienu rebħu bl-iskor ta’ 4-2.
