F’nofs din il-ġimgħa se jintlagħab programm sħiħ mill-Premier League Ingliż fejn l-attenzjoni tingħata lin-naħa ta’ fuq kif ukoll lin-naħa t’isfel tal-klassifika fejn wara l- logħob ta’ tmiem il-ġimgħa l-leaders Arsenal kabbru l-vantaġġ għal sitt punti fuq Manchester City li anke ġew milħuqa minn Aston Villa.
Iżda l-mistoqsija issa hija: Arsenal se jżommu l-vantaġġ li jinsabu fih meta għat-tmiem fadal 18-il logħba oħra? M’hemmx triq oħra ħlief li nistennew u naraw.
Intant, huma l-Gunners li se jagħlqu dan il-21 programm meta nhar il-Ħamis jilqgħu fl-Emirates Stadium liċ-champions Liverpool li mill-aħħar tmien ħarġiet ħadu erba’ rebħiet u erba’ draws jiġifieri fallew tmien punti minn 24 possibbli.
Min-naħa tat-team ta’ Mikel Arteta huma rebħu sitt logħbiet, ġew draw darba u tilfu darba.
Ċertament forma li tikkonformi mal-pożizzjoni li jinsabu fiha. Huma ġejjin minn rebħa ta’ 3-2 għand Bournemouth u r-Reds minn żewġ draws kontra Leeds United (0-0) u Fulham (2-2).
Manchester City se jerġgħu jkunu f’darhom wara żewġ draws ukoll, l-aħħar waħda meta marru 1-0 minn fuq kontra Chelsea minn Tijjani Reijnders (24) u sofrew id-draw minn Enzo Fernandez (94).
L-avversarji tagħhom se jkunu Brighton li qabel ir-rebħa 2-0 kontra Burnley kienu għamlu sitt logħbiet bla rebħa li fihom ħadu tliet punti minn daqstant logħbiet.
Chelsea se jkunu fi Craven Cottage biex jiffaċċjaw lil Fulham li ġejjin minn logħba ferm sodisfaċenti kontra ċ-champions li fiha fetħu l-iskor u wara li marru minn taħt irnexxielhom jieħdu punt mas-suffara b’goal minn Harrison Reed (97).
Minbarra li kisbu punt prezzjuż kontra Manchester City fl-aħħar logħba tal-20 programm, Chelsea, li jinsabu mingħajr manager, għollew il-moral tagħhom biex żammew kuntatt ma’ ta’ fuqhom tant li jinsabu b’31 punt bħal Manchester United.
Fit-tielet post b’punti ndaqs mas-City hemm Aston Villa li għelbu lil Nottingham Forest 3-1 f’darhom u issa ż-żewġ timijiet jinsabu distanzjati bi tmien punti minn Liverpool li għandhom 34 punt.
L-ewwel logħba se ssir waħedha llum li hija konfront kollu għas-salvazzjoni meta fil-London Stadium, West Ham jilqgħu lil Nottingham Forest li fi tmiem il-ġimgħa t-tnejn sfaw fuq in-naħa telliefa.
Bournemouth se jiltaqgħu kontra Tottenham f’darhom fejn wara t-telfa ma’ Arsenal jippruvaw ipattu b’rebħa kontra l-ġirien tat-Tramuntana ta’ Londra, Tottenham.
Spurs ħallew vantaġġ ta’ 1-0 jaħarbilhom minn idejhom meta kienu home kontra Sunderland iżda dawn donnhom li ma jaqtgħu qalbhom qatt kif urew f’din il-logħba.
Anke l-logħba Brentford kontra Sunderland hija waħda intriganti bil-Bees ġejjin minn rebħa 4-2 għand Everton li fiha l-attakkant Brażiljan, Igor Thiago, skorja hat-trick.
Aston Villa se jmorru għand Crystal Palace li mill-aħħar 10 logħbiet ħadu 11-il punt biss.
L-Eagles sfaw megħluba 2-0 minn Newcastle waqt li l-Villans għelbu lill-Forest f’darhom.
Fil-Hill Dickinson Stadium, Everton se jospitaw lil Wolves li ġejjin mill-ewwel rebħa tal-istaġun li fiha għelbu lil West Ham 3-0 bil-goals kollha jaslu fl-ewwel taqsima.
Din kienet l-aqwa logħba tat-team tal-Midlands li issa jippruvaw jiġbru iktar punti biex jitilgħu iktar viċin it-timijiet ta’ fuqhom.
F’Turf Moor, Burnley se jilqgħu lil Manchester United, bil-Clarets issa ilhom ma jirbħu għal 11-il logħba, waqt li l-United se jkomplu jitħabtu biex jiksbu post fiċ-Champions League fl-istaġun li ġej.
Newcastle se jippruvaw jagħmluhom tliet rebħiet konsekuttivi meta jkunu f’St James Park kontra Leeds United li qed jagħmlu l-almu tagħhom biex jitbegħdu miż-żona tar-relegazzjoni.
