Meta r-raba’ ġurnata tal-Premier League Ingliż m’għandhiex konfront bejn timijiet mit-Top Six, l-attenzjoni tinxteħet fuq id-derby ta’ Londra li fiha l-leaders assoluti, Arsenal, jilqgħu lill-promossi l-ġodda, Fulham, li kellhom bidu altru minn diċenti.
Arsenal v Fulham – Dan id-derby ta’ Londra jista’ jara lil Arsenal ikabbru s-sensiela ta’ rebħ iżda żgur li m’għandhomx jissottovalutaw lil Fulham li minkejja li għadhom telgħin miċ-Championship qed ikunu avversarji diffiċli għal kulħadd.
L-akkwisti ta’ Gabriel Jesus u Oleksandr Zinchenko mingħand Manchester City qed ikunu importanti fil-forma tat-team.
Southampton v Man U. – Din il-logħba hija waħda minnhom fejn is-Saints jilqgħu lil Manchester United f’St Mary’s meta qed igawdu punt iktar minnhom meta kisbu rebħa u draw u sofrew telfa.
Il-United kienu ġejjin minn żewġ telfiet diżastru kontra Brighton u Brentford iżda nhar it-Tnejn kisbu ġieħhom meta għelbu lil Liverpool f’ġurnata ta’ protesti mill-partitarji barra u fil-ground kontra s-sidien tal-club.
Min-naħa tal-United il- players qamu għall-okkażjoni biex taw l-ewwel rebħa lill-manager Erik ten Hag.
Brentford v Everton – Il-Bees, li jinsabu fit-tieni staġun mal-kbar wara assenza ta’ 74 sena, se jkunu f’darhom kontra Everton li qed ikomplu fuq l-istaġun l-ieħor tant li għadhom kisbu punt biss.
Everton għadhom għaddejjin bl-isforzi tagħhom li jsaħħu t-team iżda ż-żmien għaddej ġmielu qabel ma s-suq jagħlaq nhar il-Ħamis li ġej.
Brighton v Leeds – Din hija logħba bejn żewġ timijiet li kellhom bidu mill-aqwa meta t-tnejn kisbu seba’ punti kull wieħed tant li jinsabu żewġ punti biss taħt Arsenal.
Leeds donnhom li ħadu ħajja ġdida taħt il-manager Amerikan, Jesse Marsch u dan urewh meta l-Ħadd li għadda għelbu lil Chelsea 3-0.
Chelsea v Leicester – Il-Blues iridu jpattu għat-telfa imsemmija meta jilqgħu lil Leicester fi Stamford Bridge. Dan meta l-bidu tagħhom xejn ma kien feliċi tant li jinsabu fit-12-il post. Il-manager Thomas Tuchel għadu qed jipprova jsaħħaħ it-team.
Min-naħa tal-Foxes huma għadhom kisbu punt biss u qed jokkupaw il-post ta’ qabel l-aħħar.
Liverpool v Bournemouth – Liverpool ukoll ma kellhomx bidu tajjeb b’żewġ draws u telfa bl-aħħar waħda kontra Manchester United wara li fl-istaġun l-ieħor skorjaw disa’ goals kontrihom.
Ir-Reds għandhom bosta players imweġġa’ waqt li l-akkwist il-ġdid Darwin Nunes m’għamilx ġid lit-team meta tkeċċa kontra Crystal Palace u issa qed jiskontra tliet logħbiet sospensjoni. Iċ-Cherries bdew l-istaġun b’rebħa, iżda wara sofrew żewġ telfiet.
Man City v C. Palace – Iċ-champions se jilqgħu lil Crystal Palace meta jinsabu fit-tieni post jillidjaw tliet timijiet oħra, kollha fuq seba’ punti. Iżda l-Ħadd li għadda huma ġew miżmuma fi draw ta’ 3-3 minn Nedcastle wara li dawn kienu 3-1 minn fuq.
L-Eagles ukoll ħadu rebħa u draw u sofrew telfa biex għalihom dan huwa bidu nkoraġġanti.
Aston Villa v West Ham – Il-Hammers għadhom ma kisbu l-ebda punt iżda ż-żewġ rebħiet fuq Viborg fil-Conference League żgur li jagħmlulhom kuraġġ għall-ġejjieni.
Huma se jkunu f’Villa Park għal-logħba kontra l-Villa li għadhom kisbu rebħa biss minn tliet logħbiet.
Wolves v Newcastle – Kuntratju għas-sena l-oħra Newcastle diġá kisbu ħames punti u jinsabu fis-sitt post waqt li Wolves għamluhom erba’ staġuni fuq xulxin ma jirbħux fl-ewwel tliet logħbiet.
Iżda l-wirja kontra Tottenham f’telfa ta’ 1-0 is-Sibt li għadda għandha tqawwilhom qalbhom biex jirranġaw is-sitwazzjoni.
Nottm F. v Tottenham – Il-promossi l-ġodda Nottingham Forest, li għamlu l-iktar akkwisti dan is-sajf se jkunu nvoluti f’konfront intriganti meta jiltaqgħu kontra Tottenham f’darhom.
Spurs bdew b’rebħa u draw u bħal erba’ timijiet oħra l-Forest bdew b’rebħa, draw u telfa.
