Is-sitt ġurnata tal-Premier League Ingliż se tintlagħab mingħajr l-inċertezzi tat-trasferimenti meta minn issa sal-aħħar ġurnata tas-sena kulħadd jibqa’ b’li għandu. Il-programm jibda u jintemm b’żewġ logħbiet ta’ qtigħ il-qalb.
Everton v Liverpool – Id-derby ta’ Merseyside jiftaħ il-programm meta f’Goodison Park Everton jilqgħu lill-ġirien, Liverpool, li wara li bdew fuq nota negattiva, issa ħadu żewġ rebħiet biex telgħu fis-sitt post.
Min-naħa tagħhom Everton bdew b’żewġ telfiet iżda wara ħadu tliet draws li peró ftit li xejn għamlu diffrenza meta jinsabu r-raba’ mill-aħħar.
Brentford v Leeds U. – Dawn huma żewġ timijiet fin-nofs tal-klassifika li ġejjin minn draws meta għadhom tilfu logħba waħda biss kull wieħed u qed isibu x-xibka b’mod konsistenti. Rebħa għal wieħed minnhom tagħmlilhom differenza għalkemm draw jidher li huwa l-aktar riżultat possibbli.
Chelsea v West Ham – Din hija derby ta’ Londra li għandha tkun ferm interessanti, l-aktar meta Chelsea ġejjin minn telfa kontra Southampton u West Ham minn draw kontra Tottenham f’derby ieħor ta’ Londra.
Mhux xi ħaġa li tiġri spiss iżda l-Blues tilfu wara li kienu huma li fetħu l-iskor waqt li l-Hammers irkupraw auto-goal mill-player ġdid, Thiro Kehrer. Għalhekk huwa diffiċli tgħid fejn jistgħu jmorru l-punti għax dawn jintrebħu skond il-forma fil-ġurnata u mhux fuq ir- reputazzjoni.
Newcastle v C. Palace – Fl-aħħar żewġ logħbiet Newcastle kienu nvoluti f’riżultati kuntrastużi meta l-Ħadd li għadda kisbu d-draw fid-90 minuta kontra Wolves u nhar l-Erbgħa kienu fin-naħa l-ħażina meta sofrew il-goal tar-rebħa minn Liverpool fit-98 minuta.
Min-naħa tal-Palace għadhom kisbu rebħa waħda iżda jinsabu komdi fit-13-il post.
Nottm F. v Bournemouth – Minkejja n-numru ta’ akkwisti rekord li għamlu dan is-sajf, il-Forest sofrew telfa kbira ta’ 6-0 kontra Manchester City u llum żgur li jridu jpattu għaliha meta jilqgħu lil Bournemouth li s-Sibt li għadda sofrew telfa ta’ 9-0 kontra Liverpool iżda mbagħad pattew bi clean sheet kontra Wolves.
Tottenham v Fulham – It-tieni derby ta’ Londra tlaqqa’ lil Spurs kontra Fulham li jinsabu mifrudin bi tliet punti meta bejniethom iż-żewġ timijiet tilfu logħba biss li sofra t-team ta’ Marco Silva meta l-Ħadd li għadda Arsenal għelbuhom 2-1.
Barra minn hekk il-logħba se tlaqqa’ lill-aqwa skorers tagħhom, Harry Kane għal Spurs u Alexandar Mitrovic għal Fulham.
Wolves v Southampton – Is-Saints kellhom bidu diċenti bl-aħħar rebħa tkun dik 2-1 kontra Chelsea nhar it-Tlieta waqt li l-bidu ta’ Wolves ma kienx wieħed mixtieq meta għadhom ħadu tliet draws biss minn ħames logħbiet. Għalihom mistenni jiddebutta l-attakkant Awstrijak li ħadu mingħand Stuttgart, Sasa Kalajdzic.
Aston Villa v Man C. – Il-magna tal-goals, Manchester City, imorru għand Aston Villa, li l-manager tagħhom, Steven Gerrard, qed ikollu pressjoni meta jinsabu fil-post ta’ qabel l-aħħar b’rebħa waħda biss.
Pep Guardiola għaqqad il-jigsaw puzzle tiegħu bl-akkwist tal-attakkant Erling Haaland li diġá sab ix-xibka disa’ darbiet inklużi żewġ hat-tricks.
Brighton v Leicester C. – Is-Seasiders kellhom bidu tal-ġenn meta bi tliet rebħiet u draw jinsabu fir-raba’ post u Leicester qed jokkupaw l-aħħar post mingħajr l-ebda rebħa.
Minkejja li l-Foxes żammew lil Youri Tielemans milli jingħaqad ma’ wieħed mill-clubs il-kbar huma qed isibuha diffiċli b’Jamie Vardy, illum 35 sena, m’għadux li kien.
Man U. v Arsenal – Il-logħba li tgħaqqad il- programm hija waħda ta’ profil għoli meta l-United, li rebħu l-aħħar tliet logħbiet wara li bdew b’żewġ telfiet se jeħduha kontra Arsenal li huma l-uniku team b’rekord ta’ 100%.
Il-United baqa’ magħhom Cristiano Ronaldo biex b’hekk intemmlu r-rekord li kull staġun lagħab fiċ-Champions League minkejja li xorta għadu jista’ jilħaq l-għan tiegħu f’Jannar jekk l-affarijiet ma jmorrux tajjeb f’Old Trafford.
