L-ewwel ġurnata tat-tieni round li taħbat l-20 waħda tal-Premier League Ingliż se tara l-aħħar logħba tal- programm li huwa mifrux fuq erbat ijiem li hija dik bejn West Ham u Brighton li nhar il-Ħamis kisbu rebħiet importanti.
Iżda fl-ewwel ġurnata tas-sena l-ġdida se ssir dik li tidher li hija l-aqwa logħba fost l-10 li fiha l-leaders Liverpool se jilqgħu f’Anfield lil Newcastle, li wara bidu nkoraġġanti jidhru li nqatgħu sew mit-taqtiegħa għal post fiċ-Champions League meta jinsabu tmien punti wara Manchester City li anke lagħbu logħba inqas minnhom.
Liverpool ġejjin minn erba’ rebħiet u żewġ draws waqt li l-Magpies rebħu żewġ logħbiet u tilfu l-erbgħa l-oħra – rekord kuntrastuż għall-aħħar li tpoġġi lill-manager Eddie Howe fil-periklu li jitlef postu.
Ix-xahar id-dieħel ir-Reds se jitilfu lil Mohamed Salah li se jingħaqad mal-Eġittu fit-Tazza tan-Nazzjonijiet Afrikani … kif ukoll lill-Ġappuniż, Endo Wataru, li se jilgħab fit-Tazza Asjatika.
Għalhekk il-punti li jistgħu jirbħu qabel ma jmorru se jkunu ferm importanti fl-aspirazzjonijiet tagħhom.
Min-naħa ta’ Newcastle huma qed igawdu erba’ punti fuq it-tliet timijiet ta’ warajhom li jfisser li din il-ġimgħa se jibqgħu jżommu d-disa’ post anke jekk joħorġu telliefa.
It-team fit-tieni post, Arsenal, li l-Ħamis fallew iċ-ċans li jitilgħu fil-quċċata, ħadu skoss lura meta tilfu 2-0 f’darhom fid-derby ta’ Londra kontra West Ham.
Għada għandhom derby ieħor ta’ Londra meta jmorru fi Craven Cottage biex jiltaqgħu ma’ Fulham li tilfu l-aħħar tliet logħbiet u issa niżlu jokkupaw it-13-il post.
Min-naħa tal-Gunners huma jridu joqogħdu attenti minn xi żelqa oħra jekk iridu jkomplu jagħtu sfida għar- rebħ tat-titlu li ilhom ma jirbħuh 20 sena meta kellhom lil Arsene Wenger bħala manager.
L-ewwel logħba tal-lum tara lil Luton Town f’Kenilworth Road kontra Chelsea b’dawn iridu joqogħdu attenti meta l-Hatters qed jagħtu logħba diffiċli lil kull avversarju bħal ma kien il-każ kontra Liverpool u Manchester City biex insemmu tnejn biss.
Il-Blues kellhom jitħabtu biex għelbu lil Crystal Pa- lace 2-1 nhar l-Erbgħa tant li l-goal tar-rebħa wasal fl-aħħar minuta minn penalty u dan meta kienu qed jilagħbu fi Stamford Bridge.
Iżda ta’ min jgħid li minkejja l-miljuni kbar li nefqu, il-kwalitá tal-players li għandhom mhijiex l-istess bħal ta’ ftit staġuni ilu.
Aston Villa, li jinsabu fit-tielet post, fallew iċ-ċans li jitilgħu jaqsmu l-quċċata meta wara li fetħu vantaġġ ta’ 2-0 kontra Manchester United, raw dan il-vantaġġ jisfuma fix-xejn meta r-Red Devils skorjaw tliet darbiet li kienu jfissru tliet punti li rawhom jirxoxtaw l-istaġun tagħhom.
Il-Villa se jkunu f’darhom kontra Burnley f’logħba li huma favoriti li fiha jirritornaw għar-rebħ meta issa joqogħdu attenti minn xi żelqa oħra. Il-Clarets jinsabu qabel tal-aħħar ħames punti bogħod mis-salvazzjoni.
Żewġ timijiet li ġejjin minn telfa, Crystal Palace u Brentford, se jiltaqgħu f’Selhurst Park meta jinsabu punt wara l-Bees li għandhom logħba inqas minnhom biż-żewġ timijiet fil-bżonn tal-punti.
Iċ-champions Manchester City, li qabel jew wara l-logħba se jduru mal-ground bil-FIFA World Club Cup biex juruha lill-partitarji li huma ċ-champions il- ġodda tad-dinja, meta se jilqgħu lit-team tal-qiegħ, Sheffield United, li jidhru destinati li jirritornaw fiċ- Championship wara staġun wieħed.
Wolves, li ġejjin minn żewġ rebħiet fuq Chelsea u Brentford, se jkunu f’Molineux biex jiltaqgħu kontra Everton li sofrew żewġ telfiet wara li kisbu erba’ rebħiet waqt li min-naħa tagħhom Wolves, li jinsabu fil-11-il post, jippruvaw jagħmlu l-ewwel double tagħhom dan l-istaġun.
L-aħħar logħba tal-lum hija bejn Nottm Forest u Manchester United b’tal-ewwel ġejjin mir-rebħa 3-2 għand Newcastle fl-ewwel rebħa wara telfa tal-manager il-ġdid tagħhom, Nuno Espirito Santo, li seħħet b’hat-trick mill-Kiwi, Chris Wood, li Newcastle neħħew fis-sajf.
Min-naħa tal-United, huma żgur li jridu jkomplu fuq ix-xogħol tajjeb li għamlu kontra Aston Villa biex ikomplu jisfidaw għal post fiċ-Champions League fost inċertezzi fuq il-futur tal-club.
Logħba oħra għal għada wara nofsinhar hija dik bejn Tottenham u Bournemouth fejn tal-ewwel ġejjin minn telfa wara tliet rebħiet waqt li ċ-Cherries kisbu ħames rebħiet u draw.
Spurs jinsabu punt wara r-raba’ team waqt li Bournemouth qegħdin f’pożizzjoni trankwilla f’nofs il-klassifika.
Fil-logħba tat-Tlieta, West Ham ikunu fil-London Stadium kontra Brighton, meta t-tnejn kisbu rebħiet impressjonanti kontra l-ġirien ta’ Londra, Arsenal (2-0) u Tottenham (4-2). Għalhekk rebħa għal xi ħadd minnhom tarahom jersqu iktar ‘il fuq fil-klassifika.
