Il-programm tas-26 ġurnata tal-Premier League Ingliż mhux se joffri logħbiet bejn timijiet fl-ewwel erba’ postijiet iżda l-iktar waħda attraenti f’dawk li huma ismijiet hija dik bejn il-leaders Manchester City u Tottenham Hotspur li jinsabu mifrudin b’27 punt.
Man City v Tottenham – Is-City għaddejjin minn staġun tajjeb tant li jinsabu viċin il-kwarti-finali taċ- Champions League u fil- kampjonat qed igawdu disa’ punti vantaġġ fuq Liverpool li peró għandhom logħba nieqsa. Tottenham ġejjin minn tliet telfiet wara xulxin li segwew wara żewġ rebħiet waqt li s-City ġew draw waħda mill-aħħar ħames ħarġiet.
West Ham v Newcastle – Meta kulħadd stenna li Newcastle kienu se jegħrqu għal kollox, mindu sar it-teħid tal-club u ġie maħtur Eddie Howe bħala manager, l-affarijiet irranġaw ħafna tant li mill-aħħar ħames logħbiet ħadu 11-il punt li jarahom erba’ punti bogħod miż-żona l-ħamra.
Min-naħa tal-Hammers huma qed jalternaw mir-raba’ għal ħames post bl-aħħar ħarġa tagħhom rathom jiġu draw 2-2 kontra Leicester City b’goal fil-ħin miżjud.
Aston Villa v Watford – Din hija logħba bejn żewġ timijiet li dan l-aħħar mhumiex sejrin tajjeb tant li l-Villa ħadu rebħa, żewġ draws u żewġ telfiet mill-aħħar ħames logħbiet u l- Hornets ġew draw tnejn u tilfu tlieta meta issa jinsabu qabel tal-aħħar sitt punt wara Newcastle.
Brighton v Burnley – Logħba bejn żewġ timijiet li qed ikollhom staġun kuntrastuż hija din meta Brighton jinsabu fid-disa’ post bi 33 punt u l-Clarents huma ankrati fil-qiegħ tal-klassifika b’14-il punt.
Il-manager ta’ Brighton, Graham Potter, daħħal sistema ta’ tqassim fit-team li anke għandu vizzju li jikseb riżultati lejn tmiem il-partita.
C. Palace v Chelsea – Iċ- champions tal-Ewropa u rebbieħa tas-Super Cup, Chelsea, se jmorru għand Crystal Palace fl-ewwel dehra tagħhom bħala champions tad-dinja wara li l-Ħadd li għadda għelbu lil Palmeiras tal-Brażil fl-Emirati Għarab Magħquda. Dan għamluh fi ftit iktar minn sena mindu ħatru lill-Ġermaniż Thomas Tuchel bħala manager.
Illum huma se jiffaċċjaw lill-Eagles li taħt Patrick Vieira qed ikollhom staġun sodisfaċenti meta qed jokkupaw it-13-il post waqt li Chelsea, li dan l-aħħar marru ftit lura fil-kampjonat, jinsabu t-tielet erba’ punti fuq Manchester United.
Liverpool v Norwich – Friski mir-rebħa 2-0 kontra Inter fiċ-Champions League, ir-Reds se jkunu f’Anfield biex jilqgħu lil Norwich City li wara bidu tajjeb taħt il-manager Dean Smith, issa qed jerġgħu jitilfu l-punti tant li anke niżlu fit-18-il post.
Min-naħa tagħhom, Liverpool, li jinsabu fit-tieni post, ġejjin minn erba’ rebħiet wara xulxin u llum ma jidhirx li għandhom ifallu l-punti.
Southampton v Everton – Dawn iż-żewġ timijiet jinsabu mifrudin b’seba’ punti u sitt postijiet bit-team ta’ Frank Lampard, li rebaħ tliet punti biss mill-aħħar 15 irid joqgħod attent għax telf ta’ iktar punti jistgħu jkunu detrimentali. Min-naħa tas-Saints huma jinsabu f’qagħda stabbli u ma jidhrux li jistgħu jinqabdu fit-taqtiegħa kontra r-relegazzjoni.
Leeds U. v Man U. – Il- partiti bejn iż-żewġ Uniteds dejjem ikunu missielta, iżda dan l-istaġun Manchester jinsabu 20 punt aħjar minn Leeds meta qed jitħabtu biex jidħlu fiċ-Champions League waqt li t-team ta’ Yorkshire ma jidhirx li se jkun qed jissielet biex ma jaqax meta qed igawdu sitt punti vantaġġ mit-team it-tielet mill-aħħar.
Wolves v Leicester C. – Din il-logħba tagħlaq il- programm ta’ tmiem il-ġimgħa biż-żewġ timijiet ġejjin minn rebħiet importanti. Wolves minn dik kontra Tottenham li fiha għelbuhom 2-0 f’Londra u Leicester minn rebħa kbira 4-1 fl-Europa Conference League kontra Randers FC tad-Danimarka.
Bħalissa Wolves jinsabu 10 punti fuq il-Foxes meta tilfu logħba u rebħu erbgħa mill-aħħar ħames ħarġiet waqt li Leicester ġejjin minn rebħa, żewġ draws u żewġ telfiet.
