Manchester City għamlu rimonta nkredibbli meta f’darhom għelbu lil Tottenham bl-iskor ta’ 4-2 wara li dawn tal-aħħar fetħu vantaġġ ta’ żewġ goals.
Minkejja din ir-rebħa, il-coach Pep Guardiola kien kritiku tal-players tiegħu kif ukoll tal-partitarji li bbuwjaw lill-istess players fi tmiem l-ewwel taqsima hekk kif f’temp ta’ ftit sekondi huma sofrew żewġ goals eżatt qabel is-suffara għall-mistrieħ.
Wara żball ta’ Ederson, Dejan Kulusevski (44) fetaħ l-iskor għal Spurs filwaqt li Emerson (45) irdoppja permezz ta’ daqqa ta’ ras.
Iżda fit-tieni taqsima, is-Citizens kienu trasformati għal kollox u skorjaw erba’ goals mingħajr risposta minn Julian Alvarez (51), Erling Haland (53) u doppjetta ta’ Riyad Mahrez (63, 92).
