Id-Derby ta’ Manchester bejn is-City u l-United, dejjem kien wieħed ferm mistenni meta r-rivalitá bejn iż-żewġ timijiet mill-istess belt dejjem kienet ħarxa u akkanita. U din id-darba m’għandux jonqos milli jkun wieħed simili.
Il-logħba, li se ssir għada għall-ħin tat-té, se tintlagħab fl-Etihad Stadium meta bħalissa ż-żewġ timijiet jinsabu mifrudin bi tmiem punti bis-City fir-raba’ post u l-United fit-13-il post.
Iżda f’dawn l-aħħar sitt logħbiet it-team ta’ Pep Guardiola ħa erba’ punti biss waqt li tilef l-erbgħa ta’ qabel. Min-naħa ta’ Bruno Amorim, il-United rebħu erba’ punti minn rebħa kontra Everton (4-0) u draw kontra Ipswich (1-1) iżda ġejjin minn żewġ telfiet kontra Arsenal (2-0) away u Nottingham Forest (3-2) home.
Fost il-ġimgħa s-City sfaw megħluba 2-0 minn Juventus fiċ-Champions League biex ipperikolaw posthom fir-round tan-knock-out waqt li l-United għelbu lil Viktoria Plzen tar-Repubblika Ċeka 2-1 barra minn darhom b’goal lejn it-tmiem wara li kienu sabu ruħhom minn taħt.
Il-leaders Liverpool se jkunu f’Anfield biex jilqgħu lil Fulham, team li ma tafx fejn int kontrih. Min-naħa tar-Reds l-aħħar logħba tagħhom fil-kampjonat kienet id-draw 3-3 kontra Newcastle meta żball tal- goalkeeper Caoimhin Kelleher eżatt mal-ħin swielhom żewġ punti ferm importanti.
Ir-Reds peró għandhom lis-superstilla Eġizzjan, Mohamed Salah, jagħmel id-differenza kemm bil-goals kif ukoll bl-assists.
Fil-logħba ta’ kmieni wara nofs in-nhar Arsenal se jiffaċċjaw lil Everton li ġejjin mir-rebħa kbira 4-0 kontra Wolves f’Goodison Park iżda fi tmiem il-ġimgħa l-oħra kellhom il-logħba kontra Liverpool tiġi postposta minħabba l-maltemp.
Newcastle se jilqgħu lil Leicester City, issa taħt il-gwida ta’ Ruud Van Nistlerooy, u dan jidher li jista’ jimmotivahom fit-taqtiegħa kontra r-relegazzjoni bħal ma kien il-każ fl-aħħar logħba kontra Brighton meta rkupraw żvantaġġ ta’ 2-0 biex marru lejn darhom b’punt prezzjuż meta ppareġġaw l-iskor għal 2-2 fl-aħħar ħinijiet.
Logħba ferm mistennija fin-naħa t’isfel tal-klassifika tara lil Wolves jilqgħu lil Ipswich Town f’Molineux meta t-tnejn għandhom disa’ punti kull wieħed u jinsabu fl-aħħar tliet postijiet.
Wolves għadhom jipperseveraw bil-manager Gary O’Neil minkejja li qed isibuha diffiċli ħafna biex jiksbu riżultati pożittivi għalkemm l-attakk tagħhom qed isib ix-xibka b’mod konsistenti waqt li d-difiża qed issofri goals bir-radam speċjalment mis-set pieces.
Rebħa għal xi wieħed minnhom tkun tiswa mitqlu deheb biex ma jinqatgħux mit-timijiet ta’ fuqhom meta jinsabu ħames punti wara Everton u Leicester u erbgħa wara Crystal Palace.
Il-logħba tal-lejla tara team mill-East Midlands, Nottingham Forest, jissielet ma’ ieħor mill-West Midlands, Aston Villa, meta jinsabu ras imb’ras b’25 punt kull wieħed, eżattament fil-ħames u fis-sitt postijiet rispettivament.
Iż-żewġ timijiet ġejjen minn rebħiet stupendi, il-Forest minn dik 3-2 kontra Manchester United f’Old Trafford u l-Villa bl-istess skor kontra l-Ġermaniżi, RB Leipzig, fil- UEFA Champions League. Għalhekk dan għandu jkun konfront li jaf imur kull naħa.
Għada se jintlagħbu erba’ logħbiet oħra fejn jibdew Brighton u Crystal Palace f’logħba li tista’ tkun waħda bilanċjata meta mill-aħħar sitt logħbiet, is- Seagulls rebħu tmien punti u l-Eagles sebgħa, biż-żewġ timijiet ġejjin minn draws simili ta’ 2-2, Brighton għand Leicester u l-Palace f’darhom kontra Manchester City.
Wara d-Derby ta’ Manchester se jintlagħbu żewġ logħbiet mhux fil-ħin tas-soltu meta Chelsea jilqgħu lil Brentford u Southampton lil Tottenham b’dawn tal-aħħar u l-Blues kienu mpenjati fil-kompetizzjonijiet Ewropej.
Chelsea għaddejjin tajjeb tant li jinsabu fit-tieni post iżda mhux se tkun faċli għalihom kontra l-Bees, li jinsabu fid-disa’ post u huma ‘l bogħod mir-relegazzjoni.
Il-logħba l-oħra tara lis-Saints jeħduha ma’ Spurs li niżlu fil-11-il post meta għandhom 20 punt, sebgħa inqas mit-team fir-raba’ post. Huma ġejjin minn telfa 4-3 fil-kampjonat u draw ta’ 1-1 fl-Europa League kontra l-Iskoċċiżi Rangers.
West Ham se jerġgħu jkunu fil-logħba tat-Tnejn filgħaxija, iżda din id-darba se jmorru fil-kosta tan-nofs in-nhar kontra Bournemouth li f’darhom kapaċi jagħtu logħba lil kulħadd.
Il-manager tal-Hammers, Julen Lopetegui, għad għandu t-theddida li jista’ jiġi mkeċċi.
