Minn Cristian Muscat
Hekk kif matul dawn it-tlett ijiem tintlagħab it-tieni ġurnata tal-Closing Round jew aħjar it-18-il waħda tal-Malta Premier League, jispikka l-konfront bejn Valletta u Hamrun Spartans li r-rivalitá tas-snin 80 qegħda bħal donnha terġa’ tiġġedded.
Partita oħra mill-aktar interessanti hija dik bejn Sliema Wanderer u Hibernians filwaqt li Floriana jaffrontaw lil Mosta.
Logħba bejn żewġ timijiet li kisbu rebħa identika ta’ 3-0 hija dik bejn Gzira United u Birkirkara.
Min-naħa l-oħra, it-timijiet li temmew l-Opening Round fl-aħħar żewġ postijiet iżda qed juru titjib huma Naxxar Lions u Tarxien Rainbows li se jiffaċċjaw lil Zabbar St Patrick u lil Marsaxlokk rispettivament.
Valletta v Hamrun S. – Bla dubju, din il-partita mistennija tiġi segwita mill-akbar attendenza tal-istaġun fejn wieħed jantiċipa li Tony Bezzina Stadium se jkun wisq żgħir biex jospita dan il-konfront.
Skond l-aspettattivi, iż-żewġ timijiet laħqu l-għan tagħhom fl-Opening Round fejn Hamrun Spartans spiċċaw fl-ewwel post filwaqt li Valletta temmew it-tielet meta wieħed iqis li ġew promossi miċ-Challenge League … madankollu huma ttrasformaw lilhom infushom bħala protagonisti fl-ewwel parti.
Huma bdew din it-tieni fażi fuq nota mill-aktar għolja hekk kif ġejjin minn rebħa ta’ 5-0 fuq Mosta fejn is-sostitut, Andrea Zammit, skorja hat-trick biex huwa l-aqwa sostitut/skorer b’erba’ goals.
Min-naħa tagħhom, l-Ispartans ġejjin minn rebħa diffiċli ta’ 2-1 fuq Tarxien Rainbows iżda wieħed irid jgħid ukoll li saħħew l-iskwadra tagħhom fit-tentattiv li jirrepetu l-pożizzjoni tagħhom tal-ewwel fażi.
Valletta għandhom lil Diogo Joao Regala De Figueiredo Tavares sospiż.
Fiż-żewġ konfronti preċedenti, Hamrun rebħu wieħed (1-0), bl-ieħor jispiċċa fi draw ta’ 1-1.
Sliema W. v Hibernians – Din hija partita bejn żewġ ġganti tal-football Malti, li iżda, iddiżappuntaw fl-ewwel fażi, bl-aktar ikunu Hibernians li spiċċaw jilagħbu fil-Bottom Six.
Barra minn hekk, il- Pawlisti ġejjin minn żewġ telfiet – kontra Mosta (2-0) u Birkirkara (3-0) li fihom naqsu li jsibu x-xibka avversarja.
Min-naħa tagħhom, il- Wanderers ġejjin minn telfa kontra Hamrun Spartans (1-0) u rebħa diffiċli ta’ 1-0 kontra Zabbar St Patrick.
Il-Wanderers tilfu s-servvizzi ta’ Miguel Baggio li se jibda avventura barra minn xtutna.
Fl-ewwel logħba, Sliema rebħu bl-iskor ta’ 3-2.
Floriana v Mosta – Floriana jiltaqgħu kontra Mosta li huma trawmatizzati mit-telfa ta’ 5-0 kontra Valletta.
Dan ifisser li l-moral huwa kemmxejn baxx u għaldaqstant iridu jirriorganizzaw kontra team qawwi.
Floriana għandhom lil Charles M’Mombwa sospiż filwaqt li Mosta mistennija jinżlu bl-aqwa formazzjoni possibbli.
Fl-ewwel partita, Floriana ħarġu rebbieħa bl-iskor ta’ 1-0.
Gzira U. v Birkirkara – Din hija partita bilanċjata bejn żewġ timijiet li ġejjin minn rebħa u bil-logħba hija miftuħa għal kull riżultat.
Fil-partita preċedenti, iż-żewġ timijiet spiċċaw fi draw ta’ 0-0.
Naxxar L. v Zabbar SP – Wara tliet rebħiet u telfa, Naxxar Lions jiltaqgħu kontra Zabbar St Patrick li għandhom lil Ryan Scicluna u Kean Scicluna sospiżi.
Fl-ewwel fażi, Naxxar rebħu bl-iskor ta’ 2-1, bl-oħra tintemm fi draw 1-1.
Marsaxlokk v Tarxien R. – Din hija logħba bejn żewġ timijiet li ġejjin minn telfa – Marsaxlokk kontra Gzira United (3-0) u Tarxien Rainbows kontra Hamrun Spartans (2-1).
Ix-Xlukkajri se jkunu msaħħa bir-ritorn ta’ Joseph Minala minn sospensjoni.
Huma rebħu l-logħba preċedenti bl-iskor ta’ 2-0.