Curtis Jones skorja doppjetta hekk kif Liverpool, lura fil-forma, warrbu lill-isfortunati Leicester City u għelbuhom 3-0 fil-King Power Stadium biex iżommu s-sensiela rebbieħa riċenti tagħhom u jimbuttaw lill-Foxes eqreb lejn ir-relegazzjoni mill-Premier League.
It-team ta’ Jurgen Klopp rebaħ l-aħħar seba’ logħbiet biex saħħaħ l-ispinta tiegħu għal tmiem mal-ewwel erbgħa u issa jinsab punt taħt Newcastle u Manchester United, għalkemm lagħbu logħba aktar minnhom.
Hija telfa diżastruża oħra għal Leicester li tħalli liċ-champions tal-Premier League 2016 b’għeruq sodi fil-periklu fid-19-il pożizzjoni, żewġ punti biss ‘il bogħod mis-sigurtà metafadal żewġ logħbiet għat-tmiem.
Ir-Reds skorjaw darbtejn fi spazju ta’ tliet minuti fl-ewwel nofs siegħa permezz tal-istess kombinazzjoni, fejn Mohamed Salah darbtejn ta assists lil Jones (33, 36) li spiċċa b’fiduċja biex jikseb l-ewwel doppjetta tiegħu fil-Premier League.
L-iskor kellu jkun 3-0 qabel il-mistrieħ iżda l-goalkeeper tal-Foxes, Daniel Iversen, għamel save ta’ reazzjoni mill-aqwa biex iċaħħad lil Cody Gakpo mill-viċin.
Salah sostna t-tielet assist tiegħu fit-tieni perjodu billi mess free-kick lil Trent Alexander-Arnold (71) li b’xutt sublimi sammar il-ballun fir-rokna ta’ fuq.
