Chelsea v Man Utd
Manchester United se jkunu qed ifittxu li jaqbżu fir-raba’ post tal-klassifika meta jaffrontaw lil Chelsea barra minn darhom fi Stamford Bridge is-Sibt filgħaxija.
Il-Blues ġew miżmuma fi draw ta’ 0-0 minn Brentford f’nofs il-ġimgħa, filwaqt li t-tim immexxi minn Erik ten Hag b’mod konvinċenti għeleb lil Tottenham Hotspur b’rebħa ta’ 2-0.
Neqsin għar-Red Devils se jkunu Anthony Martial u Harry Maguire minħabba injury. Dan filwaqt li Chelsea se jkunu mingħajr Wesley Fofana u Reece James minħabba l-istess raġuni.
Nottingham F. v Liverpool
Wara li ż-żewġ timijiet ħarġu mill-ground fil-logħob tagħhom f’nofs il-ġimgħa b’rashom mgħollija, Nottingham Forest u Liverpool jippreparaw għall-partita li għandha tirriżulta bħala waħda ferm interessanti fis-City Ground.
It-Tricky Trees żammew lil Brighton & Hove Albion fi draw ta’ mingħajr gowls nhar it-Tlieta, 24 siegħa qabel it-tim immexxi minn Jurgen Klopp għeleb lil West Ham United bl-iskor minimu ta’1-0, bil-goal uniku għalihom jasal mill-Urugwajan Darwin Nunez.
M’hemmx dubju li Nottingham Forest kapaċi joffru oppożizzjoni denja lir-Reds.
Liverpool se jkollhom jgħaddu mingħajr is-servizzi ta’ Diogo Jota, Joel Matip u Luis Diaz minħabba injury.
Man City v Brighton & Hove Albion
Manchester City se jkunu qed ifittxu li jirritornaw għar-rebħ meta jilqgħu lil Brighton & Hove Albion fl-Etihad Stadium illum is-Sibt.
Is-Citizens sofrew l-ewwel telfa tal-istaġun kontra Liverpool fi tmiem il-ġimgħa li għaddiet, filwaqt li s-Seagulls ġew miżmuma fi draw ta’ mingħajr gowls f’darhom kontra Nottingham Forest nhar it-Tlieta.
Man City se jkunu mingħajr Kyle Walker, John Stones u Kalvin Phillips minħabba injury.
