Arsenal v Nottm F.– Arsenal, li fl-istaġun preċedenti spiċċaw fit-tieni pożizzjoni, bdew il-kampanja tagħhom b’rebħa ta’ 2-1 fuq Nottingham Forest.
Kien Edward Nketiah (26) li fetaħ l-iskor għall-Gunners meta t-tentattiv tiegħu ġie devjat minn Joe Worrall li nganna bil-goalkeeper tiegħu stess.
Imbagħad Bukayo Saka (32) irdoppja bi ġmiel ta’ goal meta dawwar il-ballun għal ġox-xibka.
Il-Forest ħasdu lil Arsenal fit-82 minuta b’goal ta’ Taiwo Awoniyi iżda l-Gunners ikkontrollaw sal-aħħar.
Bournemouth v West Ham – West Ham marru għand Bournemouth u ġew miżmuma fi draw ta’ 1-1.
Wara taqsima mingħajr goals, kien Jarrod Bowen (51) li fetaħ l-iskor għall-Hammers iżda Dominic Solanke (82) salva r-riżultat għaċ-Cherries.
Brighton v Luton – Brighton irreġistraw l-akbar rebħa meta ospitaw lill-promossi Luton Town u għelbuhom bl-iskor ta’ 4-1.
Mingħajr is-servizzi ta’ Moises Caicedo, bis-saga tiegħu tibqa’ tkarkar bejn Liverpool u Chelsea, is-Seagulls iddominaw għal kollox bl-iskorers ikunu Solly March (36), Joao Pedro (71 pen), Simon Adingra (85) u Evan Ferguson (93) filwaqt li Carlton Morris (81 pen) wieġeb għall-Hatters.
Everton v Fulham – Everton, li salvaw mir-relegazzjoni proprju fl-aħħar ġurnata tal-istaġun li għadda, bdew fuq nota negattiva meta f’darhom sfaw megħluba minn Fulham bl-iskor ta’ 1-0.
L-eroj tagħhom kien is-sostitut Bobby de Cordova-Reid (73) li ta t-tliet punti lill-Cottagers b’xutt fir-rokna tax-xibka.
Madankollu, it-Toffees fallew bosta ċansijiet tad-deheb minn Neal Maupay fi tliet tentattivi u ieħor minn Abdoulaye Doucoure filwaqt li Nathan Patterson laqat il-lasta.
Sheffield U. v C. Palace – Crystal Palace marru għand Sheffield United u rebħulhom bl-iskor ta’ 1-0, bl-uniku goal tal-partita jasal minn Odsonne Edouard (49).
