Minn Cristian Muscat
Illum u għada tintlagħab it-tmien ġurnata tal-Closing Round tal-Malta Premier League, jew aħjar l-24 waħda tal-istaġun.
Hekk kif fadal erba’ ġranet oħra, il-kwadru bħal donnu qed jifforma ruħu biex ikunu magħrufa s-sitt timijiet li se jilagħbu fit-Top Six u dawk li jkollhom jikkuntentaw li jilagħbu fil- Bottom Six.
Dan il-programm huwa mill-aktar interessanti li jikkonsisti f’konfronti diretti. Iżda l-aktar wieħed li jispikka hu dak bejn Birkirkara u Hibernians li, flimkien ma’ Marsaxlokk, jinsabu fit-tieni pożizzjoni.
Dawn tal-aħħar jaffrontaw lil Sliema Wanderers li jinsabu tliet punti warajhom li ġejjin ukoll minn żewġ telfiet konsekuttivi.
Iż-żewġ timijiet li flimkien qed jokkupaw il-quċċata tal-klassifika, Floriana u Hamrun Spartans, ikunu involuti f’partiti delikati meta jiltaqgħu kontra Mosta u Hamrun Spartans rispettivament.
Min-naħa l-oħra, iż-żewġ timijiet li jinsabu fl-aħħar żewġ postijiet, Balzan u Naxxar Lions, jaffrontaw lil Melita u lil Zabbar St Patrick.
Birkirkara v Hibernians – Din hija partita bejn żewġ timijiet li ġejjin minn rebħa u jinsabu fit-tieni post tal- klassifika.
Filwaqt li Birkirkara għelbu lil Zabbar St Patrick bl-iskor ta’ 3-0, Hibernians rebħu lil Mosta bl-iskor ta’ 2-0.
Fil-veritá, il-pressjoni hija kollha fuq Hibernians, Dan minħabba li fl-Ewwel Fażi Birkirkara temmew fit-tieni post tal-klassifika u għaldaqstant diġá bbukkjaw posthom fis-semi-finali għar-rebħ tat-titlu … sakemm Floriana ma jirbħux din it-Tieni Fażi wkoll għax f’dan il-każ jiġu dikjarati champions.
Il-Pawlisti ma jistgħux jinkludu lil Pedro Henrique Nunes Silva li jkun qed jiskonta t-tieni sospensjoni nfila.
Min-naħa l-oħra, il-Karkariżi mistennija jinżlu bl- aqwa formazzjoni possibbli.
Fiż-żewġ partiti preċedenti, kull team ħareġ rebbieħ bl-iskor identiku ta’ 2-0.
Sliema v Marsaxlokk – Dan huwa konfront bejn żewġ timijiet li fl-aħħar tliet ħarġiet, irreġistraw rebħa u sofrew żewġ telfiet.
Filwaqt fl-aħħar logħba, Marsaxlokk għelbu lil Gzira United bl-iskor ta’ 1-0, Sliema Wanderers ġejjin minn telfa ta’ 2-1 kontra r-rivali eterni, Floriana.
Għall-Wanderers, xejn għajr minn rebħa ma tissodisfa l-kriterji tagħhom minħabba l-fatt li jridu jispiċċaw għall-inqas fit-tieni post. U biex jagħmlu hekk iridu jiġbru l-punti meta bħalissa jinsabu ħames punti taħt il-ko-leaders, Hamrun Spartans u Floriana.
Marsaxlokk se jkollhom jgħaddu mingħajr iż-żewġ players Lucas Lopez Dessypris u Diver Duvan Torres Quinones għax jinsabu sospiżi filwaqt li għall-Wanderers, Murilo Henrique Freire Bernardo, se jkun sospiż għall-ħames darba f’dan l-istaġun.
Fil-partita tal-Ewwel Fażi, is-Slimiżi kienu ħarġu rebbieħa bl-iskor ta’ 1-0.
Floriana v Mosta – Ir-rebbieħa tal-Ewwel Fażi, Floriana, jaffrontaw lil Mosta, f’dik li hija meqjusa bħala partita delikata minkejja li l-Mostin huma dejjem enigma … imprevidibbli fl- inkonsistenza.
Konxji mill-fatt jekk itemmu fl-ewwel post f’din il-fażi, il-Greens jiġu dikjarati champions mingħajr ma jintlagħbu s-semi-finali.
Għaldaqstant jimmiraw li jkomplu għaddejjin b’din is-sensiela pożittiva.
Min-naħa ta’ Mosta, iridu l-punti biex jevitaw li jilagħbu fil-Bottom Six wara li fl-Ewwel Fażi lagħbu mal-ewwel sitta.
L-uniku player sospiż hu dak Mosti, Joao Teixeira.
Min-naħa l-oħra ż-żewġ timijiet jilqgħu player minn sospensjoni – Floriana lil Dunstan Vella u Mosta lil Prince Afriyie.
Fiż-żewġ logħbiet preċedenti, Floriana ħarġu rebbieħa 2-0 u 1-0.
Hamrun S. v Gzira U. – Hamrun Spartans, li kellhom jitħabtu biex għelbu lil Balzan bl-iskor minimu ta’ 1-0, jiltaqgħu kontra Gzira United li ġejjin minn telfa ta’ 1-0 kontra Marsaxlokk.
Minkejja li qed jaqsmu l-ewwel post, fil-veritá l-Ispartans huma ‘l bogħod mill-forma li għamlithom champions fl-istaġun li għadda u bħal donnhom għadhom ma bdewx jikkonvinċu fil-logħob tagħhom.
Min-naħa l-oħra din hija partita diffiċli għall-Maroons u jimmiraw li jieħdu xi ħaġa minn dan il-konfront fit-tentattiv li ma jispiċċawx fil-Bottom Six.
Hamrun għandhom lil Ederson Bruno Domingos sospiż.
Fil-partita preċedenti, l- Ispartans ħarġu rebbieħa bl-iskor ta’ 2-1.
Naxxar L. v Zabbar SP – Naxxar Lions, li ġejjin minn żewġ rebħiet konsekuttivi jiffaċċjaw lil Zabbar St Patrick li ġejjin minn telfa ta’ 3-0 kontra Birkirkara.
Il-Lions għandhom lill- Ġappuniż, Takuma Yamaguchi sospiż.
Fiż-żewġ logħbiet diretti, ġie reġistrat draw ta’ 3-3 filwaqt li ż-Żabbarin rebħu l-logħba l-oħra bl-iskor ta’ 3-0.
Balzan v Melita – Din hija partita bejn żewġ timijiet li ġejjin minn telfa – Balzan kontra Hamrun Spartans (1-0) u Melita kontra Naxxar Lions (5-2).
Balzan se jkunu msaħħa bir-ritorn ta’ Triston Caruana minn sospensjoni.
Fiż-żewġ partiti preċedenti Melita ħarġu rebbieħa bl-iskors ta’ 2-0 u 1-0.
