F’dibattitu fil-plenarja mal-Presidenti Michel u von der Leyen dwar is-summit informali ta’ Versailles (10–11 ta’ Marzu) u l-Kunsill Ewropew li jmiss (24–25 ta’ Marzu), il-MPE faħħru lill-Istati Membri tal-UE għar-rispons rapidu tagħhom fl-adozzjoni ta’ sanzjonijiet bla preċedent kontra r-Russja immedjatament wara l-attakk. Huma faħħru wkoll il-mod li bih miljuni ta’ refuġjati li qed jaħarbu mill-gwerra fl-Ukraina ġew milqugħa.
“Ir-Russja hija responsabbli għal din il-gwerra”, issottolinja l-President tal-Kunsill Ewropew Charles Michel, filwaqt li ikkundanna wkoll il-mewt, il-qerda u t-tbatija kkawżati lill-poplu Ukren u l-bliet tagħhom. Michel assigura lill-MPE li mhux se jkun hemm impunità għal dawk responsabbli għad-delitti tal-gwerra u faħħar lill-koalizzjoni internazzjonali li ngħaqdet madwar l-“għan komuni li jingħeleb Vladimir Putin”. Bil-paċi u l-prosperità bħala għan ġenerali, l-UE teħtieġ li tnaqqas id-dipendenza tagħha fuq l-enerġija, ittejjeb l-arkitettura tas-sigurtà tagħha u ssaħħaħ il-bażi tal-ekonomija tagħha, huwa kkonkluda.
“Jekk il-libertà għandha isem, isimha huwa l-Ukrajna, u illum il-bandiera tal-Ukrajna hija l-bandiera tal-libertà”, qalet il-President tal-Kummissjoni Ursula von der Leyen. Hija enfasizzat li l-UE se tagħmel li din il-gwerra tkun falliment strateġiku għal Putin. Is-sanzjonijiet severi diġà qed ikollom l-effetti negattivi mixtieqa u r-riżorsi li Putin qed tuża biex jiffinanzja din il-gwerra għandhom jitwaqqfu. Fir-rigward tal-enerġija, hija għamlitha ċara li “l-politika tal-enerġija hija wkoll parti mill-politika tas-sigurtà” u li l-UE diġà għandha u ser tkompli tadotta miżuri biex issir indipendenti mill-importazzjonijiet Russi tal-gass u ż-żejt.
Il-biċċa l-kbira tal-MEPE qablu li l-UE għandha ssaħħaħ l-awtonomija strateġika tagħha fir-rigward tad-difiża u l-enerġija, u għandha tagħmel dan malajr. Filwaqt li nnutaw li l-importazzjonijiet tal-UE tal-gass Russu qed jiffinanzjaw indirettament l-attakk Russu fuq l-Ukrajna, huma rrakkomandaw id-diversifikazzjoni tax-xiri tal-enerġija u l-investiment fl-enerġija rinnovabbli. Ħafna indikaw l-effett li ż-żieda fil-prezzijiet tal-enerġija qed ikollha fuq l-ekonomija u r-riskji għas-sigurtà tal-ikel, u appellaw għal appoġġ għall-familji u n-negozji.
Matul id-dibattitu tqajmu wkoll il-prospetti għall-Ukraina biex tissieħeb fl-UE u l-ħtieġa li tiġi difiża d-demokrazija kontra reġimi awtokratiċi oħra, bħaċ-Ċina. Fl-aħħar nett, diversi MPE insistew li l-Istati Membri kollha għandhom jaqsmu r-responsabbiltà li jipproteġu lil dawk li jaħarbu mill-Ukrajna, u mhux biss il-pajjiżi ġirien.
