Ċpar qawwi madwar ir-Renju Unit qed joħloq problemi kbar għall-ivvjaġġar bl-ajru u anke bit-triq, b’dewmien u kanċellazzjonijiet li qed jolqtu eluf ta’ passiġġieri.
Is-servizzi nazzjonali tat-traffiku mill-ajru kkonfermaw li ġew imposti restrizzjonijiet temporanji tat-traffiku bl-ajru biex tiġi żgurata s-sigurtà f’żoni b’viżibilità baxxa.
Fl-Ajruport ta’ Gatwick, fejn il-viżibilità kienet partikolarment baxxa, 32 titjira li kellhom jaslu u 42 titjira li kienu se jitilqu kellhom jittardjaw aktar kmieni waranofsinhar. Fl-istess waqt, fl-Ajruport ta’ Heathrow, kien hemm dewmien fuq seba’ titjiriet u waħda ġiet ikkanċellata. Il-Ġimgħa, aktar minn 20,000 passiġġier ġew affettwati, inkluż dawk li kellhom titjiriet EasyJet ikkanċellati u rritorni tagħhom ittardjaw sal-Ħadd filgħaxija.
Is-Servizz Meterjoloġiku (Met Office) bassar li ċ-ċpar se jippersisti b’viżibbiltà f’xi żoni li tista’ saħansitra tonqos għal 100 metru biss. Is-sewwieqa qed jiġu mwissija biex iżidu d-distanza tal-brejkijiet, filwaqt li l-vjaġġaturi huma mħeġġa jiċċekkjaw l-aħħar dettalji tat-titjiriet tagħhom qabel jitilqu għall-ajruport.
Il-vjaġġaturi wrew frustrazzjoni, b’uħud isibuha diffiċli jorganizzaw akkomodazzjoni alternattiva u mezzi ta’ trasport. Madankollu, xi wħud irnexxielhom jadattaw, b’passiġġier wieħed jinnota li kellhom xorti li kellhom qraba viċin biex joqogħdu magħhom, kif ukoll għajnuna minn ġirien biex jieħdu ħsieb l-annimali domestiċi.
Is-sewwieqa u l-vjaġġaturi huma mħeġġa jippreparaw għal aktar dewmien hekk kif iċ-ċpar ikompli.
