Il-Gvern ta’ Malta ressaq għad-diskussjoni żewġ Abbozzi ta’ Liġi u żewġ Abbozzi ta’ Avviżi Legali li bihom irid iwettaq riforma favur ippjanar sensibbli u responsabbli. Għalhekk il-Gvern qed jiftaħ proċess ta’ konsultazzjoni dwar dawn l-abbozzi li fihom il-Gvern huwa kommess li jġib riforma meħtieġa li ġġib ġustizzja fis-settur permezz ta’ bidliet ħolistiċi favur dixxiplina, ċarezza u ċertezza fil-qasam tal-ippjanar.
Il-proċess ta’ konsultazzjoni pubblika fejn fost oħrajn, il-pubbliku inġenerali huwa mistenni jgħid tiegħu, se jiġi mgħarbel u analizzat minn grupp ta’ ħidma mmexxi mill-Kap tas-Segretarjat fi ħdan l-Uffiċċju tal-Prim Ministru, il-Kurunell Dr Mark Mallia. Il-grupp se jkun kompost mid-Deputat Prim Ministru Ian Borg, il-Ministri Owen Bonnici, Clint Camilleri, Miriam Dalli u Jonathan Attard, is-Segretarju Permanenti Ewlieni Tony Sultana u s-Segretarju tal-Kabinett Ryan Spagnol. Il-Kap Eżekuttiv tal-Awtorità tal-Ippjanar Johann Buttigieg huwa osservatur f’dan il-grupp li Segretarja tiegħu se tkun Dr Jessica Galea.
Dan il-grupp ta’ ħidma mhux biss se jgħarbel u janalizza s-sottomissjonijiet iżda fil-perjodu miftuħ ta’ konsultazzjoni pubblika se jiltaqa’ wkoll ma’ stakeholders ewlenin. Permezz ta’ din ir-riforma, il-Gvern irid ikompli jsaħħaħ id-drittijiet taċ-ċittadin fosthom bil-bidla fil-proċess tal-appelli li biha żvilupp jiġi sospiż sakemm tingħata deċiżjoni fi stadju t’appell b’termini stipulati ta’ żmien.
Il-konsultazzjoni pubblika se tkun miftuħa anki fuq żewġ Abbozzi ta’ Avviżi Legali li jindirizzaw il-ħtieġa li l-pajjiż jibda paġna ġdida u biex min tħalla jiżbalja fil‑passat iħallas t’għemilu u jagħti lura kumpens lill‑pajjiż. Minn hemm ’il quddiem irid jintbagħat sinjal favur ippjanar sensibbli u responsabbli li jagħti serħan il‑moħħ u trankwillità lill‑Maltin u l‑Għawdxin.
Tista’ tipparteċipa f’din il-konsultazzjoni pubblika sal-Ħadd, 7 ta’ Settembru 2025 billi żżur is-sit konsultazzjoni.gov.mt.