Mijiet ta’ dimostranti lbieraħ niżlu fit-toroq f’Turin, Milan u bliet oħrajn Taljani biex juru l-għadab tagħhom għar-restrizzjonijiet li ġew imposti mill-Gvern Taljan u li se jwasslu biex restoranti u kafetteriji jagħlqu kmieni , filwaqt li swali taċ-ċinema, gyms u postijiet tad-divertiment jingħalqu temporanjament.
F’Turin, uħud mid-dimostranti attakkaw ħwienet u kienu involuti fi ġlied mal-Pulizija fil-pjazza fejn hemm il-kwartieri tal-gvern reġjonali tal-Pjemonte.
Il-midja lokali rrapportat li fotografu li kien fuq il-post indarab wara li ntlaqat minn flixkun mitfugħ. Il-pulizija rrispondew billi tefgħu gass tad-dmugħ fuq id-dimostranti fi Piazza del Castello.
F’dik l-istess pjazza sigħat qabel madwar 300 taxi inġabru b’mod paċifiku biex jiġbdu l-attenzjoni tal-awtoritajiet għat-telf finanzjarju li qed isofru kaġun tal-impatt li l-pandemija kellha fuq it-turiżmu.
