Goals minn Lionel Messi (26) u Sergio Ramos (76) taw rebħa ta’ 2-0 lil Paris St-Germain kontra Nice għand dawn tal-aħħar hekk kif issa jinsabu sitt punti aktar minn Lens fil-quċċata ta’ Ligue 1.
Il-midfielder stilla tal-Arġentina, li ġimgħa ilu kien ibbuwjat mill-partitarji tiegħu stess, skorja b’konklużjoni mill-ewwel minn centre baxx fil-kaxxa ta’ Nuno Mendes.
Imbagħad Sergio Ramos għamel ċert mir-rebħa b’daqqa ta’ ras minn corner ta’ Messi.
Il-goalkeeper ta’ PSG, Gianluigi Donnarumma, għamel saves eċċellenti biex fl-ewwel taqsima ċaħħad lil Hicham Boudaoui u Nicolas Pepe.
Il-captain ta’ Nice, Dante, qabad ballun laxk u ra x-xutt tiegħu jaħbat mal-lasta l-mimduda u l-lasta l-wieqfa qabel spiċċa barra, filwaqt li Youssouf Ndayishimiye ttanta xortih minn tarf il-kaxxa, iżda Donnarumma tar minn tulu biex isalva l-isforz tiegħu.
PSG rebħu tmienja mill-aħħar 10 titli ta’ Ligue 1, u issa rritornaw għar-rebħ wara żewġ telfiet fil-kampjonat.