Il-Malta Police Union (MPU) tat direttiva lill-pulizija membri tagħha biex minn għada l-Ħadd fis-6.00 a.m. jilbsu t-T-shirt, il-beritta tal-baseball jew l-ID maħruġin mill-Pulizija waqt li jkunu qed jagħmlu xogħol extra jew overtime.
Ħabbret dan il-MPU wara li qalet li l-kwistjoni li kellha mal-Korp tal-Pulizija dwar l-immaniġġjar tat-traffiku, li dwarha iddikjarat tilwima industrijali, baqgħet ma ġietx solvuta.
Waqt li għamlitha ċara li għax-xogħol fil-ħin normali l-pulizija għandhom jilbsu l-uniformi sħiħa, l-MPU rrimarkat li l-Korp tal-Pulizija sab il-pandemija konvenjenti biex jużaha bħala skuża għal kull nuqqas ta’ azzjoni amministrattiva.
Il-MPU żiedet tgħid li bħala union tikkunsidra dan is-servizz bħala opportunità għall-uffiċjali li jaqilgħu xi ħaġa żejda waqt li ma jkunux xogħol. Spjegat li dan is-servizz jitħallas mill-persuna nnifisha jew mill-enitità li titlob għal dan is-servizz u l-approvazzjoni tingħata biss meta l-uffiċjal ikun disponibbli fit-tali ħin u tali ġurnata tas-sejħa.
