Skwadra ta’ suldati Russi, li tinsab akkużata li wettqet krimini ta’ gwerra fil-belt ta’ Bucha fl-Ukrajna, għadha kemm ingħatat titlu ta’ unur mill-President Russu Vladimir Putin.
F’ittra li bagħat Putin ilbieraħ lill-iskwadra ’64th Separate Guards Motor Rifle Brigade’, huwa feraħ lill-membri ta’ din l-iskwadra “għall-eroiżmu u l-kuraġġ kbir” u ppremjahom bit-titlu ta’ “gwardjani” talli “proteġew lis-sovranità Russa”.
Fi stqarrija li ħarġet fl-4 ta’ April, il-Ministru għad-Difiża Ukrena ddefinixxa lis-suldati ta’ din l-iskwadra bħala “kriminali tal-gwerra” minħabba li l-iskwadra Russa kellha involviment dirett fl-atroċitajiet li twettqu fuq ir-residenti ta’ Bucha.
Iktar kmieni dan ix-xahar, wara t-tluq tal-forzi Russi minn Kyiv, f’Bucha u fi Borodyanka nstabu għadd ta’ oqbra b’mijiet ta’ residenti Ukreni li sfaw vittmi tar-Russi.
