“Putin beda l-pjan tiegħu bil-għan li jeqred lill-Ukrajna. Imma dak li qed jagħmel hu wkoll, fil-fatt, qed jeqred il-futur ta’ pajjiżu stess.”
Hekk qalet il-President tal-Kummissjoni Ewropea, Ursula von der Leyen fl-indirizz tagħha fejn ipproponiet diversi miżuri lill-mexxejja Ewropej. Fost l-oħrajn ipproponiet biex għadd ta’ banek Russi jitneħħew mis-sistema Swift.
In coordination with 🇺🇸🇫🇷🇩🇪🇮🇹🇨🇦🇬🇧 I will now propose new measures to EU leaders to strengthen our response to Russia’s invasion of Ukraine and cripple Putin’s ability to finance his war machine. https://t.co/iU2waDzo9s
— Ursula von der Leyen (@vonderleyen) February 26, 2022
Innotat kif ftit kilometri biss mill-fruntiera tal-Lvant tal-UE, l-armata Russa qed twettaq dawk li ddeskriviet bħala azzjonijiet barbari.
“Qed tibbumbardja u tispara missili, u dan qed iwassal biex jinqatlu nies innoċenti. Fl-istess ħin, id-dinja kollha qed tara r-reżistenza determinata u kuraġġuża mill-armata u l-popolazzjoni Ukrajna,” qalet Von der Leyen.
Żiedet tgħid: “Hekk kif il-forzi Russi iniedu l-attakk tagħhom fuq Kiev u bliet oħra tal-Ukrajna, aħna determinati li nkomplu nimponu sanzjonijiet enormi fuq ir-Russja, sanzjonijiet li se jkomplu jiżolaw lir-Russja mis-sistema finanzjarja internazzjonali u l-ekonomiji tagħna.”
