Hayrettin Kök huwa l-aħħar vittma ta’ inċident f’sit ta’ kostruzzjoni f’Ta’ Xbiex.
Fost ħbieb li sellmu l-memorja tiegħu kien hemm dawk li qalu li jinsabu ferm imnikktin bl-aħbar tat-telfa tiegħu.
Mustafa Keleş kien fost dawk li sellem il-memorja tiegħu fuq il-midja soċjali u kiteb li l-vittma kien ilu snin jgħix f’pajjiżna.
Il-każ seħħ ilbieraħ għall-ħabta 6:00 p.m f’sit ta’ kostruzzjoni fi Triq Testaferrata kantuniera ma’ Triq Enrico Mizzi, Ta’ Xbiex.
Minn stħarriġ illi sar irriżulta li raġel Tork ta’ 49 sena residenti Tas-Sliema waqa’ madwar tliet sulari ġo xaft waqt li kien qed jaħdem.
Fuq il-post issejħu l-membri tal-Protezzjoni Ċivili u tim mediku sabiex jassistu, u ambulanza ħadet lir-raġel l-Isptar Mater Dei għall-kura meħtieġa, iżda sfortunatament ir-raġel ġie ċċertifikat mejjet ftit tal-ħin wara.
Il-Maġistrat tal-Għassa Dr Astrid May Grima ġiet infurmata bil-każ u ħatret inkjesta.
