Minn Cristian Muscat
Kif bdiet l-imħabba tiegħek lejn il-basketball?
L-imħabba tiegħi lejn il-basketball bdiet min meta kont żgħira ħafna, saħansitra minn nursery. Minn dak iż-żmien, il-logħba dejjem kienet parti minn ħajti. Kull ma jgħaddi ż-żmien, iktar bdejt nifhimha, napprezzaha u ngħixha, kemm fuq il-court kif ukoll barra minnu. Minn hemm qatt ma ħarist lura – il-basketball kiber miegħi u baqa’ passjoni li ma nistax nimmaġina ħajti mingħajru.
Ħa mmur mal-ewwel għall-punt. Kif qed tħares lejn l-esperjenza ġdida tiegħek ma’ Starlites Naxxar Basketball Club?
Rigward l-esperjenza ġdida tiegħi ma’ Starlites Naxxar Basketball Club, qed inħares lejha bħala opportunità importanti biex inkompli nikber kemm bħala plejer kif ukoll bħala persuna. Il-klabb għandu ambjent professjonali u pożittiv, u qed nieħu pjaċir naħdem mal-kowċis u sħabi fit-tim biex nilħqu l-għanijiet tagħna flimkien.
Iddeskrivi l-esperjenzi preċedenti tiegħek fil-basketball u kemm tgħallimt minnhom.
Fil-passat kelli diversi esperjenzi fil-basketball li għenuni nitgħallem ħafna, kemm f’termini tekniċi kif ukoll mentalment. Tgħallimt kif inkun aktar konsistenti, kif naċċetta l-isfidi, u kemm hu importanti li tibqa’ taħdem fuqek innifsek anke meta l-affarijiet ma jmorrux kif tixtieq.
X’tikkummenta fuq il-livell tal-basketball f’pajjiżna fil-preżent?
Il-livell tal-basketball f’pajjiżna fil-preżent qed juri titjib, b’aktar żgħażagħ qed jidħlu fl-isport u b’kompetizzjoni dejjem tikber. Hemm ħafna talent, u nemmen li bil-ħidma t-tajba u aktar investiment, il-basketball Malti jista’ jkompli jikber u jilħaq livell ogħla.
U dak tar-riżorsi (courts) fejn titħarrġu u jkollkom il-kompetizzjonijiet uffiċjali tagħkom?
Fir-rigward tar-riżorsi u l-courts, għad hemm lok għal titjib, speċjalment f’dak li għandu x’jaqsam ma’ faċilitajiet moderni u spazji adegwati għat-taħriġ u kompetizzjonijiet uffiċjali. Minkejja dan, qed nagħmlu l-aħjar u nuru dedikazzjoni kbira biex inkomplu ntejbu l-livell tagħna.
Kif qed tħares lejn il-futur aktar imbiegħed tiegħek fil-basketball?
Meta nħares lejn il-futur aktar imbiegħed tiegħi fil-basketball, nixtieq inkompli niżviluppa, nilgħab fuq livell dejjem aktar kompetittiv, u forsi anke nikkontribwixxi lura lejn l-isport, kemm bħala plejer kif ukoll f’rwoli oħra fil-futur.
Għaddi messaġġ finali lil min jixtieq jibda jipprattika l-basketball u jkollu karriera ta’ suċċess f’dan l-isport.
Il-messaġġ finali tiegħi lil min jixtieq jibda jipprattika l-basketball u jkollu karriera ta’ suċċess huwa li qatt ma jaqta’ qalbu, jaħdem b’dedikazzjoni, jisma’ mill-kowċis, u jemmen fih innifsu. Is-suċċess ma jiġix mil-lum għall-għada, imma b’paċenzja, dixxiplina u passjoni, kollox huwa possibbli