Qormi Daikin dawru telfa f’rebħa sabiex għelbu lil Floriana Young Stars 4-1 f’logħba mill-hockey 7s li ntlagħbet fil-kumpless tal-hockey f’Kordin.
Il-Qriema kienu qed jitilfu 1-0 hekk kif Justin Farrugia kien poġġa lill-Greens minn fuq. Madankollu r-reazzjoni tagħhom kienet immedjata hekk kif dawru l-iskor favurihom b’gowls ta’ Giorgio Muscat, Wyatt Magri, Neil Spiteri Montebello u John Williams.
Umpires kienu Dario Cacopardo u Alessandro Amore.
F’logħba oħra mill-istess kompetizzjoni, White Hart għelbu lil Rabat 3-1. Wara li l-ewwel tliet quarters ma pproduċew l-ebda gowl, ir-raba’ quarter kien wieħed ferm movimentat fejn ġew skorjati erba’ gowls.
Andrew Foster kien l-eroj għal White Hart meta skorja doppjetta b’Elias Vella li żied ieħor għat-tim tiegħu.
Matthew Buhagiar skorja l-uniku gowl għal Rabat Depiro.
Umpires kienu Alessandro Amore u Karl Chircop.
F’logħba mill-kampjonat ta’ taħt l-14-il sena, Floriana Young Stars għelbu lil Qormi Daikin 5-1.
Il-Furjaniżi dejjem kienu minn fuq b’Qormi li setgħu biss inaqqsu l-marġni tal-iskor darba.
Dean Spiteri kien l-eroj għal Floriana meta skorja erba’ gowls filwaqt li Gabriel Cordina kien ukoll fost l-iskorers.
Qormi skorjaw l-uniku gowl grazzi għal Zachary Farrugia.
Umpires kienu Glen Bonello u Kane Zammit.
