Raġel ta’ 21 sena ġie akkużat bi qtil wara li tarbija ta’ seba’ xhur, li kienet fi pram, tilfet ħajjitha fi sparatura fi New York.
Amuri Greene wieġeb mhux ħati għall-akkużi miġjuba kontrih meta tressaq fil-Qorti l-Ġimgħa. Il-każ kien seħħ fl-1 t’April, bl-uffiċjali jemmnu li t-tarbija kienet il-vittma mhux intenzjonata ta’ sparatura relatata ma’ gang.
Il-Pulizija qalu li t-tieni suspettat – Matthew Rodriguez ta’ 18-il sena – ġie arrestat b’rabta mal-isparatura u l-akkużi fil-konfront tiegħu għadhom pendenti.
Filmati tal-inċident kienu juru żewġt irġiel fuq mutur isuqu kontra d-direzzjoni tat-traffiku fil-viċinat ta’ Williamsburg f’Brooklyn, u r-raġel li kien fuq wara deher joħroġ arma u jispara. L-uffiċjali jemmnu li kien Greene li allegatament wettaq l-isparatura. Huwa kien ukoll waqa’ minn fuq il-mutur wara l-inċident u ttieħed l-isptar għall-kura fejn imbagħad inżamm taħt il-kustodja tal-pulizija.
Skont il-pulizija, Rodriguez allegatament kien qed isuq il-mutur waqt li seħħet l-isparatura.