Raġel li nhar it-Tnejn li għadda kien mixli fl-Istati Uniti b’rabta mal-bomba fuq l-ajruplan tal-linja tal-ajru Pan Am li sploda fuq ir-raħal Skoċċiż ta’ Lockerbie kien vjaġġa lejn Malta. Dan joħroġ minn affidavit li kien ippubblikat mill-FBI.
Id-Dipartiment tal-Ġustizzja lbieraħ ħabbar akkużi ġodda fil-konfront ta’ raġel ta’ nazzjonalità Libjana b’rabta mal-isplużjoni tat-titjira 103 li qatlet 259 persuna li kienu abbord l-ajruplan, u 11-il persuna oħra li kienu fuq l-art.
L-akkużi kienu żvelati fit-32 sena mindu seħħet l-isplużjoni u fl-aħħar konferenza tal-aħbarijiet indirizzata mill-Avukat Ġenerali William Barr.
Fil-preżentazzjonijiet ta’ akkużi ġodda, id-Dipartiment tal-Ġustizzja se jkun qed jerġa’ jiftaħ każ li affettwat ir-relazzjonijiet diplomatiċi bejn l-Istati Uniti u l-Libja, u wriet fiċ-ċar it-theddida mit-terroriżmu fuq skala internazzjonali aktar minn għaxar snin mill-attakki terroristiċi tal-11 ta’ Settembru.
Il-każ kontra Abu Agela Mas’ud Kheir Al-Marimi, ir-raġel li allegatament għamel il-bomba, attwalment huwa wieħed aktar teoretiku milli prattiku ladarba Masud mhuwiex fil-kustodja tal-awtoritajiet Amerikani u mhuwiex ċar jekk hux se jkun fil-kustodja tagħhom, jew jekk l-evidenza mressqa hijiex se tkun biżżejjed biex issarraf f’sentenza kontrih.
Masud issa huwa t-tielet uffiċjal tas-servizzi sigrieti Libjani mixli fl-Istati Uniti b’rabta mal-każ Lockerbie, u se jkun l-ewwel wieħed li se jkun qed jgħaddi ġuri f’Qorti Amerikana.
