Libjan ta’ 36 sena li m’għandux indirizz fiss f’pajjiżna ammetta li seraq e-scooter minn Ħal Qormi u li għex ħajja ta’ għażż u vagabondaġġ.
Amer Enir Elssaeh tressaq fil-Qorti mixli li nhar it-22 ta’ Awwissu li għadda, seraq e-scooter li jiswa madwar €180. Huwa kien arrestat l-Erbgħa li għadda.
Elssaeh ġie mixli wkoll li kien riċediv, billi kien diġà kkundannat xahrejn ħabs tallii kien fil-pussess ta’ drogi sintentiċi.
Fil-Qorti, l-imputat wieġeb ħati għall-akkużi miġjuba fil-konfront tiegħu u sostna li dak li għamel, għamlu minħabba l-problemi finanzjarji u tad-droga illi għandu, hekk kif huwa jinsab mingħajr residenza u qed jgħix ħajja ta’ vagabondaġġ.
Id-Difiża talbet li jsir pre-sentencing report fil-konfront tal-imputat minħabba ċ-ċirkostanzi personali speċifiċi tiegħu. Elssaeh se jibqa’ jinżamm taħt arrest preventiv sakemm tingħata s-sentenza f’Ottubru li ġej.
Il-Prosekuzzjoni tmexxiet mill-Ispettur John Sammut flimkien mal-Avukat Giuliana Magro Conti mill-Uffiċċju tal-Avukat Ġenerali. L-Avukat tal-Għajnuna Legali Marty Farrugia deher għall-imputat.